బెజవాడ అంటేనే కులాల చిచ్చు రగిలే నగరం. గతంలో అప్పట్లో వంగవీటి, దేవినేని కుటుంబాల మధ్య ఉన్న జాతి వైరం రాష్ట్ర రాజకీయాల పైన కూడా ప్రభావం చూపిస్తూ ఉండేది. ప్రస్తుతానికి వస్తే.. దివంగత వంగవీటి రంగా కుమారుడు రాధా టీడీపీలోను, దేవినేని నెహ్రూ వారసుడు అవినాష్ వైసీపీలో ఉన్నారు. వేర్వేరు పార్టీల్లో ఉన్నప్పటికీ వీరి మధ్య వివాదాలు లేవనే చెప్పాలి. అయితే.. తనను హత్య చేసేందుకు రెక్కీ నిర్వహించినట్లు వంగవీటి రాధా ఇటీవల చేసిన  వ్యాఖ్యలు రాష్ట్ర వ్యాప్తంగా తీవ్ర సంచలనం రేపాయి. రాధాపై రెక్కీ చేసినట్లు ఆరోపణలు ఎదుర్కొంటున్న అరవ సత్యం ఎవరనేది పలువురిలో ఆసక్తిగా ఉంది. రాధా హత్యకు కుట్ర చేసింది రాజకీయ నాయకులే అనే చర్చ కూడా రాష్ట్ర వ్యాప్తంగా జరుగుతోంది.

వంగవీటి రాధాపై రెక్కీ నిర్వహించిన వ్యక్తి అరవ సత్యం అనే ఊహాగానాలు వస్తుండడంతో పోలీసులు అరవ సత్యాన్ని అదుపులోకి తీసుకుని ప్రశ్నించినట్లు మీడియాలో వార్తలు వచ్చాయి . వాస్తవానికి విజయవాడ మున్సిపల్ కార్పొరేషన్ లో వైసీపీ ఫ్లోర్ లీడర్ గా వ్యవహరిస్తున్నాడు అరవ సత్యం. అరవ సత్యం ఉరఫ్ వెంకట సత్యనారాయణ దేవినేని కుటుంబానికి వీర విధేయుడు. వైసీపీ యువనేత దేవినేని అవినాష్కు అత్యంత సన్నిహితుడునే పేరుంది. అరవ సత్యంను కొందరు రౌడీ అని, ఇంకొందరు గూండా అని చెబుతుంటారు.  యాదవ సామాజిక వర్గానికి చెందిన అరవ సత్యం దేవినేనితో అత్యంత సన్నిహితుడుగా మెలగడం కీలకమైన విషయం అంటారు.

వెంకట సత్యనారాయణ అనే తనపై 1992లో ప్రత్యర్థులు ఓ కేసులో ఇరికించినప్పుడు అరవ సత్యం అనే ముద్ర వేశారట. సత్యం కుటుంబం తెలుగువారే. అరవ సత్యం ఒకటో తరగతి నుంచి సూర్యారావుపేటలోని ప్రగతి నికేతన్లో చదివాడు. అరవ సత్యానిది ఒకప్పుడు మధ్య తరగతి కుటుంబం. సత్యం తండ్రి ఇంజిన్ ఆయిల్ వ్యాపారం చేసేవారు. అరవ సత్యంకు భార్య, కొడుకు ఉన్నారు. మధ్య తరగతి కుటుంబానికి చెందిన సత్యానికి అత్యంత ఖరీదైన క్యూ 7 ఉంది. తన కొడుక్కి జాగ్వార్ కారు కొని ఇవ్వడం విశేషం.

దూకుడుగా ఉండే అరవ సత్యం కెరీర్ ఓ ప్రింటింగ్ ప్రెస్లో పనివాడిగా మొదలైంది. 2002లొ విజయవాడ కార్పొరేషన్లో డిప్యూటీ మేయర్ గా ఎన్నికయ్యాడు. బీసీ సంఘాలతో బాగా తిరుగుతాడు. దేవినేని కుటుంబానికి వీర విదేయుడిగా ఉంటూ, నెహ్రూ ఆశయాలన సాధన కోసమే అవినాష్కు అనుంగు అనుచరుడిగా వ్యవహరిస్తున్న అరవ సత్యం పేరు వంగవీటి రాధా రెక్కీ వ్యాఖ్యలతో మరోసారి తెరమీదకు రావడం గమనార్హం.