కరణ్ జోహార్ ను చితగొట్టండి.. కేంద్ర మంత్రి
Published on: Sat Jan 23, 2016 3:24PM

మాజీ జనరల్ ప్రస్తుత కేంద్ర మంత్రి వీకే సింగ్ మరోసారి వివాదాస్పద వ్యాఖ్యలు చేసి వార్తల్లోకి ఎక్కారు. బాలీవుడ్ చిత్ర నిర్మాత కరణ్ జోహార్ పై ఆయన సంచలన వ్యాఖ్యలు చేశారు. మంత్రి గారికి.. కరణ్ జోహార్ కి సంబంధం ఏంటని అనుకుంటున్నారా..? అదేంటంటే.. ఈ మధ్య కాలంలో దేశంలో అసహనం గురించిన చర్చలు ఎక్కువయ్యాయి. ఈ నేపథ్యంలోనే మత అసహనం గురించి జరుగుతున్న చర్చ మీద ఈ మధ్య కరణ్ జోహార్ ఓ ఇంటర్వ్యూ ఇచ్చాడు. దీనిలో ఆయన మాట్లాడుతూ దేశంలో వ్యక్తిగత విషయాలు ఏం మాట్లాడినా జైలుకెళ్లాల్సిందే అని.. మత అసహనం గురించి మాట్లాడిన వారి పరిస్థితి ఏమైందో చూశాం కదా అందుకని ఈ విషయంపై తానేమి మాట్లాడనని అమీరు ఖాన్ గురించి గుర్తు చేస్తూ పరోక్షంగా ప్రభుత్వంపై విమర్శలు గుప్పించాడు. ఇక్కడి వరకూ బానే ఉంది. అయితే భాజపా కార్యకర్తల్ని కలిసేందుకు ఓ కార్యక్రమానికి వచ్చిన మంత్రి వీకే సింగ్ ను కరణ్ మాట్లాడిన దానిపై విలేకరులు అడిగారు. దీనికి తాను స్పందిస్తూ ముందు ఈ విషయాన్ని కరణ్ నే అడగాలని చెప్పినా తరువాత మాత్రం కార్యకర్తలు వెళ్లి కరణ్ ను చితగ్గొట్టాలని నోరు జారేశారు. దీంతో ఇప్పుడు మంత్రిగారు చేసిన వ్యాఖ్యలపై కొంతమంది మండుతున్నారు.


