మన చేతుల్లో ఉండే ప్రతి స్మార్ట్‌ఫోన్, మన కార్లలో ఉండే నావిగేషన్ సిస్టమ్స్ రోజూ జీపీఎస్ (GPS) సిగ్నల్స్ ఆధారంగానే పనిచేస్తున్నాయి. అయితే, గత 20 ఏళ్లుగా మనకు తెలియకుండానే ప్రతి రోజూ మన ఫోన్లు అమెరికా సైన్యానికి సంబంధించిన అత్యంత రహస్యమైన కోడ్‌లను రిసీవ్ చేసుకుంటున్నాయనే సంచలన నిజాన్ని శాస్త్రవేత్తలు బయటపెట్టారు. లండన్ యూనివర్సిటీ కాలేజీకి చెందిన ఇన్ఫర్మేషన్ సెక్యూరిటీ రీసెర్చ్ గ్రూప్ హెడ్, ప్రొఫెసర్ స్టీవెన్ ముర్డోక్ జరిపిన తాజా పరిశోధనలో ఈ ఆశ్చర్యకరమైన విషయాలు వెలుగులోకి వచ్చాయి. సాధారణంగా ప్రపంచవ్యాప్తంగా మిలిటరీ అవసరాల కోసం, గూఢచర్యం కోసం పాత కాలంలో రేడియో తరంగాల ద్వారా  నంబర్స్ స్టేషన్స్  నిర్వహించేవారు. కానీ అమెరికా మిలిటరీ మాత్రం అత్యాధునిక సాంకేతికతను వాడుకుంటూ, యావత్ ప్రపంచం ఉపయోగిస్తున్న పబ్లిక్ జీపీఎస్ వ్యవస్థనే ఒక గ్లోబల్ నంబర్స్ స్టేషన్‌గా మార్చేసిందని ఆధారాలతో సహా నిరూపించారు.

ఈ రహస్య ఆపరేషన్ అంతా జీపీఎస్ డేటాలోని ఒక చిన్న నిగూఢమైన భాగంలో దాగి ఉంది. దాని పేరే సబ్‌ఫ్రేమ్ 4, పేజీ 17 (Subframe 4, Page 17). ఇది కేవలం 176-బిట్ పరిమాణం ఉన్న ఒక చిన్న ఖాళీ స్లాట్. ప్రొఫెసర్ ముర్డోక్ ఒక దశాబ్దం క్రితం యూరోపియన్ స్పేస్ ఏజెన్సీ ప్రాజెక్ట్‌లో పనిచేస్తున్నప్పుడు, ఈ నిర్దిష్ట భాగంలో కొన్ని వింతైన, యాదృచ్ఛికమైన (random) డేటా సిగ్నల్స్ వస్తుండటాన్ని గమనించారు. ప్రకృతిలో లేదా సాధారణ సాంకేతిక వ్యవస్థల్లో ఇలాంటి పూర్తిగా రాండమ్ డేటా రావడం చాలా అరుదు. ఒకవేళ అలా వస్తుందంటే అది కచ్చితంగా ఎన్‌క్రిప్ట్ చేయబడిన రహస్య సమాచారమే అయి ఉంటుందని ఆయన బలంగా అనుమానించారు. ఆ అనుమానంతోనే దాదాపు 2007 నుండి సేకరించిన జీపీఎస్ రికార్డింగ్‌లను విశ్లేషించడం ప్రారంభించారు.

ఈ పరిశోధనలో భాగంగా జర్మనీకి చెందిన GFZ హెల్మ్‌హోల్ట్జ్ సెంటర్ ఫర్ జియోసైన్సెస్ భద్రపరిచిన 12 మిలియన్లకు పైగా అబ్జర్వేషన్లను ముర్డోక్ పరిశీలించారు. ఈ భారీ డేటా విశ్లేషణలో వారికి 3,994 ప్రత్యేకమైన 176-బిట్ రహస్య సందేశాలు లభించాయి. వాటిని లోతుగా పరిశీలించగా, 2010 ఫిబ్రవరిలో ఒక ప్రత్యేకమైన కోడింగ్ ప్యాటర్న్ (సెంటినెల్) కనిపించింది. ఇది కేవలం ఒకే ఒక శాటిలైట్ కాకుండా, 2011 మే 26వ తేదీన ఒకేసారి కొన్ని గంటల వ్యవధిలోనే అంతరిక్షంలో ఉన్న మొత్తం 31 ఆపరేషనల్ జీపీఎస్ శాటిలైట్ల నుండి ప్రసారమైంది. ఈ టైమ్‌లైన్‌ను అమెరికా మిలిటరీకి చెందిన డీక్లాసిఫైడ్ (రహస్య ముద్ర తొలగించిన) పాత డాక్యుమెంట్లతో క్రాస్ వెరిఫై చేయగా అసలు నిజం బయటపడింది. పెంటగాన్ తన గ్లోబల్ క్రిప్టోగ్రాఫిక్ కీలను రిమోట్‌గా అప్‌డేట్ చేయడానికి ఉపయోగించే ఓవర్-ది-ఎయిర్ డిస్ట్రిబ్యూషన్  (OTAD) నెట్‌వర్క్ యాక్టివేషన్ డేటానే అది అని తేలింది.