తెలంగాణా ప్రాంతంలో ఉప ఎన్నికలకు కారణమైన టిఆర్ ఎస్ నేతలకు, ఆ పార్టీ తరపున రంగంలో వున్న అభ్యర్ధులకు టెన్షన్ మొదలైంది. ఉప ఎన్నికల ప్రచారం ముగిసిన తరువాత ఓటర్ల నాడిని గమనించేందుకు వారు మంతనాలు జరుపుతున్నారు. ఈ ఎన్నికల్లో ఏదో విధంగా గట్టేక్కితే బాగానే ఉంటుంది. ఒకవేళ రెండు లేదా మూడు స్థానాలు కోల్పోయినా అది తెలంగాణా ఉద్యమానికి పెద్ద దెబ్బ అవుతుందని వారు భయపడుతున్నారు. సకల జనుల సమ్మె తరువాత తెలంగాణా సెంటిమెంట్ ఈ ప్రాంతంలో మరింత పెరిగిందని మొదట తెరాస నాయకులు భావించారు. తెలంగాణా ప్రజలు ఇతర పార్టీల నాయకులకు ఎన్నికల ప్రచారంలో అడ్డుకుంటారని కూడా వారు ఆశించారు. అయితే పరిస్థితులు ఇందుకు భిన్నంగా కనిపించాయి.

తెలంగాణా సెంటిమెంట్ బాగా తగ్గిందని తెరాస నాయకులే అంగీకరిస్తున్నారు. కాంగ్రెస్, టిడిపి నేతల ప్రచారాన్ని అడ్డుకోవాలని తెరాస నాయకులు పదే పదే రెచ్చగొట్టినప్పటికి స్థానిక ప్రజలెవరూ అటువంటి ప్రయత్నాలు ఎక్కడా చేయలేకపోవడం వారికి మరింతకలవరాన్ని కలిగించింది. కొన్ని చోట్ల టిఆర్ఎస్ కార్యకర్తలకే ప్రజల నుంచి ప్రతిఘటన ఎదురైంది. ఉద్యమం పేరుతో టిఆర్ఎస్ నాయకులు డబ్బులు దండుకుంటున్నారని, అటువంటి వారికి తాము ఈసారి ఓట్లు వేసేది లేదని ప్రజలు నిర్భయంగా చెప్పారు. టిఆర్ఎస్ తరపున ఎన్నికల ప్రచారంలో భాగంగా తమ గ్రామాలకు వస్తున్నా విద్యార్థులను కూడా స్థానికులు ప్రతిఘటించారు. ఈ ఎన్నికల్లో తమ ఉనికిని చాటి కనీసం నాలుగైదు స్థానాల్లో టిఆర్ఎస్ ను ఓడించడానికి కాంగ్రెస్, టిడిపిలు సర్వశక్తులూ ఒడ్డాయి. ప్రచారం ముగిసిన తరువాత ఆఖరి ప్రయత్నంలో భాగంగా డబ్బు, మద్యంతో ఓటర్లను ఆకట్టుకోవడానికి ఈ రెండు పార్టీలు ప్రయత్నిస్తున్నాయి. మారుతున్న పరిస్థితులుల్లో కొన్ని నియోజకవర్గాల్లో టిఆర్ఎస్ కు ఎదురుదెబ్బ తగలవచ్చని రాజకీయ పరిశీలకులు భావిస్తున్నారు.