1. ఎప్పటికైనా ధర్మం, న్యాయం గెలుస్తుందని అమరావతి ఉద్యమాన్ని చూస్తే అర్ధం అవుతుందని టీడీపీ అధినేత చంద్రబాబు అన్నారు. ఎంతో పకడ్బందీగా, ముందు చూపుతో సీఆర్‌డీఏ చట్టాన్ని తీసుకొచ్చాం.. అందుకే, హైకోర్టులో ఆ చ‌ట్టం నిల‌బ‌డింది.. ప్రజా రాజధానిని కాపాడుకున్నది అమరావతి రైతులు, రాష్ట్ర ప్రజలే. ఈ విజయం 5 కోట్ల ఆంధ్రుల‌ విజయం.. అని అన్నారు. రాజధాని కోసం అలుపెరగని పోరాటం చేసిన రైతులు, మహిళలను చంద్ర‌బాబు అభినందించారు. 

2. తమ ప్రభుత్వ విధానం మూడు రాజధానులేనని మంత్రి బొత్స మ‌రోసారి స్పష్టం చేశారు. హైకోర్టు తీర్పుపై సుప్రీంకోర్టుకు వెళ్లాలో లేదో చర్చించి చెబుతాం.. చట్టాలు చేసేందుకే శాసనసభ, పార్లమెంట్‌ ఉన్నాయి. శాసనసభలో చట్టాలు చేయకూడదంటే ఎలా? మూడు నెలల్లో ప్లాట్లు ఇవ్వాలంటే సాధ్యమా లేదా చూడాలని మంత్రి బొత్స అన్నారు.  

3. అమరావతి రాజధానిపై హైకోర్టు 307 పేజీల తీర్పు ఇచ్చింది. అమరావతిని రాజధానిగా అభివృద్ధి చేయాలని హైకోర్టు ఆదేశించింది. సీఆర్డీఏ చట్టం ప్రకారమే ప్రభుత్వం వ్యవహరించాలని ఆదేశించింది. భూములిచ్చిన రైతులకు 3 నెలల్లో ప్లాట్లు అప్పగించాలని.. ఒప్పందం ప్రకారం 6 నెలల్లో మౌలిక సదుపాయాలు కల్పించాలని, హైకోర్టు పర్యవేక్షణలోనే అభివృద్ధి జరగాలని నిర్దేశించింది. అమరావతి నుంచి ఏ కార్యాలయాన్నీ తరలించకూడదని, అమరావతి భూములను తనఖా పెట్టకూడదని హైకోర్టు ఆదేశించింది. 

4. ముఖ్యమంత్రి జగన్మోహన్ రెడ్డి అమరావతి రైతులకు క్షమాపణ చెప్పాలని జనసేన నేత నాదెండ్ల మనోహర్ డిమాండ్ చేశారు. ధర్మం గెలుస్తుందని, న్యాయం నిలబడుతుందని నమ్మి ఉద్యమం చేసిన రైతులకు అభినందనలు తెలిపారు. జగన్ మూర్ఖ‌పు పాలనతో.. లక్షన్నర కోట్ల పెట్టుబడులు ఇతర రాష్ట్రాలకు తరలి వెళ్లాయన్నారు. హైకోర్టు తీర్పును ప్రభుత్వం అమలు పరిచే వరకు జనసేన పోరాడుతుందని నాదెండ్ల మనోహర్ స్పష్టం చేశారు.

5. ఢిల్లీలో సీఎం కేసీఆర్‌తో భారతీయ కిసాన్ యూనియన్ నాయకుడు రాకేష్ తికాయత్ భేటీ జ‌రిగింది. కేసీఆర్‌తో ఎలాంటి రాజకీయ చర్చ జరగలేదని తికాయత్‌ తెలిపారు. దేశంలో ఒకే వ్యవసాయ పాలసీ ఉంటే బాగుంటుందన్నారు. వచ్చే ఏడాది హైదరాబాదులో కిసాన్ సమ్మె ఏర్పాటు చేస్తున్నామని తికాయత్ ప్రకటించారు. 

6. తెలంగాణ‌లో ఐఎఎస్, ఐపీఎస్‌ల పోస్టింగ్‌లపై టీపీసీసీ చీఫ్‌ రేవంత్‌రెడ్డి.. సీఎం కేసీఆర్‌కు బ‌హిరంగ లేఖ రాశారు. ఎనిమిదేళ్లుగా ఇంకా పరాయి పాలనలోనే మగ్గుతున్నామన్నారు. కీలకమైన శాఖలు బీహార్ అధికారుల చేతుల్లోనే ఉన్నాయని ఆరోపించారు. ఉద్యమంలో కీలకంగా పనిచేసిన అధికారులు నిరాదరణకు గురవుతున్నారని రేవంత్‌రెడ్డి లేఖ‌లో తెలిపారు. 

7. మంత్రి శ్రీనివాస్‌గౌడ్‌పై హత్యా యత్నం కేసు నమోదైంది. మహబూబ్‌నగర్‌కు చెందిన రాఘవేంద్రరాజు పోలీసులకు ఇచ్చిన స్టేట్‌మెంట్‌లో సంచలన విషయాలు వెలుగులోకి వచ్చాయి. 2017 నుంచి త‌న‌ను చంపేందుకు ప్రయత్నం చేశారని చెప్పారు. శ్రీనివాస్‌గౌడ్ నుంచి ప్రాణ హాని ఉందని.. వేధింపులు తట్టుకోలేకే మంత్రిని చంపాలనుకున్నాన‌ని చెప్పారు. త‌న‌పై శ్రీనివాస్‌గౌడ్ 30 కేసులు పెట్టించారని.. ఒకే రోజు 10 కేసులు పెట్టార‌ని.. త‌న బార్‌షాప్‌ మూసివేయించి ఇబ్బందిపెట్టారు. ఆర్థికంగా 6 కోట్ల నష్టం చేశారని.. నాకు రావాల్సిన డబ్బులను రాకుండా అడ్డుకున్నారని రాఘవేంద్రరాజు తెలిపారు.

8. అమరావతి రాజధాని అంశంలో తీర్పు ఇచ్చిన న్యాయమూర్తులకు శిరస్సువంచి పాదాభివందనం చేస్తున్నట్టు తెలిపారు ఎంపీ ర‌ఘురామ‌. అమరావతిని కొంచం కూడా కదపలేరని తాను ముందే చెప్పానని గుర్తు చేశారు. అమరావతి అంశంలో సుప్రీంకోర్టుకు వెళ్తే ఇంకా దెబ్బలు పడతాయని హెచ్చరించారు. మనోవేదనతో మరణించిన రైతుల మ‌ర‌ణాలు అన్నీ ప్రభుత్వ హత్యలుగా పరిగణించాలని డిమాండ్ చేశారు. 

9. అసెంబ్లీ బడ్జెట్ సమావేశాలకు వెళ్లాలా? వద్దా? అనే దానిపై టీడీపీ పొలిట్‌బ్యూరోలో చర్చ జరిగిన‌ట్టు తెలుస్తోంది. టీడీఎల్పీలో చర్చించి తుది నిర్ణయం తీసుకుంటామని నేతలు చెబుతున్నారు. ఏడాది పాటు ఎన్టీఆర్ శత జయంతి ఉత్సవాల నిర్వహణ.. హైదరాబాద్‌లో ఎన్టీఆర్ శత జయంతి ఉత్సవాలు.. విజయవాడలో మహానాడు జరపాలని టీడీపీ నిర్ణయం తీసుకుంది. 

10. ఏపీలో ఇంటర్మీడియట్ పరీక్షలు వాయిదా ప‌డ్డాయి. ఏప్రిల్‌ 22 నుంచి మే 12 వరకు పరీక్షలు జరుగనున్నాయి. పాత‌ షెడ్యూలు ప్రకారం ఇంట‌ర్ ఎగ్జామ్స్‌ ఏప్రిల్‌ 8 నుంచి 28 వర‌కు జ‌ర‌గాల్సి ఉండ‌గా అవి వాయిదా ప‌డ్డాయి. ఇక‌, ఇంటర్ ప్రాక్టికల్ పరీక్షలు మాత్రం యధావిధిగా మార్చి 11 నుంచి 31 వరకు జరగనున్నాయి.