హైదరాబాద్ నగరాన్ని విశ్వనగరంగా తీర్చిదిద్దే ప్రయత్నాలు కేసీఆర్ ప్రభుత్వం ముమ్మరంగా చేస్తోంది. ప్రజలకు అన్నీ అందుబాటులో వుండేలా కేసీఆర్ ప్రభుత్వం చర్యలు తీసుకుంటోంది. అందులో భాగంగానే దసరా నుంచి హైదరాబాద్‌లో భారీగా కల్లు దుకాణాలను తెరవడానికి సన్నాహాలు చేస్తోంది. హైదరాబాద్‌లోని అన్ని ప్రాంతాల్లో ప్రజలకు చిక్కని కల్లు అందుబాటులోకి తేవాలని ప్రభుత్వం నిర్ణయించడం కల్లు ప్రియులలో ఆనందాన్ని కలిగిస్తోంది. ప్రభుత్వం తమవిషయంలో చూపిస్తున్న శ్రద్ధని వారు ఎంతో ఆసక్తిగా గమనిస్తు్న్నారు. ఈ నేపథ్యంలో హైదరాబాద్‌ నగరం కల్లు దుకాణాలతో కళకళలాడేట్టు చేయాలని తెలంగాణ రాష్ట్ర శాసనమండలి అధ్యక్షుడు గౌడ కులస్తులకు పిలుపు ఇచ్చారు. ఈ ప్రకటన కల్లు ప్రియుల పట్ల ప్రభుత్వానికి ఉన్న వాత్సల్యం, కల్లు గీత కార్మికుల మీద వున్న అభిమానానికి దర్పణం పట్టేలా వుందన్న వ్యాఖ్యలు వినిపిస్తు్న్నాయి. పాశ్చాత్య సంస్కృతికి ఆకర్షితులైపోయి బాటిళ్ళకు బాటిళ్లు బీర్లు తాగుతున్న యువతరం త్వరలో తెలంగాణ ప్రభుత్వం ఏర్పాటు చేసే కల్లు దుకాణాల్లో ముంతలు చేతపడితే అది మన సంస్కృతి పరంగా మంచి మార్పు అయ్యే అవకాశం వుందన్న అభిప్రాయాలు కల్లు ప్రియుల్లో వ్యక్తమవుతున్నాయి. హైదరాబాద్‌లో విరివిగా కల్లు దుకాణాలు ఏర్పాటు చేయడం వల్ల ప్రజలందరికీ మంచి నాణ్యమైన కల్లు అందుబాటులో వుంటుందన్న అభిప్రాయాలు కూడా వినిపిస్తున్నాయి.