ప్రస్తుత ఉప ఎన్నికల్లో కిరాయి కార్యకర్తల జోరు పెరిగిపోయింది. డబ్బులు తీసుకుని తమతమ ప్రాంతాల్లో టెంట్లు వేస్తూ అభ్యర్దులు  వచ్చినప్పుడు వారికి ఘనంగా స్వాగతం పలకడం, తమ వార్డుల్లో అభ్యర్దులను తిప్పడం ఈ కిరాయి కార్యకర్తల ప్రధానమైన పని. అయితే ఎవరు డబ్బిస్తే వారి వెంట తిరుగుతున్న ఈ కార్యకర్తలు ఒక్కోసారి తాము ఎవరి తరపున ప్రచారం చేస్తున్నామో కూడా మర్చిపోతున్నారు. ఇటువంటి సంఘటనే తిరుపతిలో జరిగింది.

తిరుపతిలో ఈ కిరాయి కాంగ్రెస్ కార్యకర్తలు తమ అభ్యర్థి ఎం.వెంకరమణ అనుకుని వై.కా.పా. అభ్యర్థి భూమాన కరుణాకరరెడ్డిని పూలతో ముంచెత్తారు. ఆ తరువాత జరిగిన తప్పు తెలుసుకుని నాలిక్కరుచుకుని  భూమానకు జల్లిన పూలను తిరిగి బుట్టలోకి ఏరి కాంగ్రెస్ అభ్యర్థి ఎం.వెంకటరమణపై జల్లేశారు. హమ్మయ్య! వెంకటరమణ చూడలేదు కాబట్టి సరిపోయిందని కార్యకర్తలు సర్దుకున్నారు. ఈ సంఘటన తిరుపతి ఎన్నికల ప్రచారంలో భాగంగా పెద్దకాపు లే - అవుట్ సందులో జరిగింది. కానీ, తనకు ఇంత ఆదరణా అని భూమాన కొద్దిసేపు ఆశ్చర్యపోయేలా కాంగ్రెస్ కార్యకర్తలు మిద్దెలపై నుంచి పూలు కురిపించారు. తిరిగి ఆ పూలే వెంకటరమణ పైనా కురిపించారు. ఒకే పూలతో ఇద్దరు అభ్యర్దులను సంతృప్తి పరిచిన ఘనత కాంగ్రెస్ కార్యకర్తలకే దక్కింది కదూ!