ఆంధ్రప్రదేశ్ రాష్ట్రంలో మూడు కేన్సర్ ఆస్పత్రలను ఏర్పాటు చేయనున్నారు. విజయవాడ, నెల్లూరు, కర్నూలు నగరాల్లో ఈ ఆస్పత్రలను ఏర్పాటు చేయనున్నామని ఆంధ్రప్రదేశ్ రాష్ట్ర వైద్య ఆరోగ్య శాఖ మంత్రి కామినేని శ్రీనివాస్ విశాఖపట్నంలో వెల్లడించారు. ఈ మూడు కేన్సర్ ఆస్పత్రుల ఏర్పాటుతోపాటు రాష్ట్రంలోని అన్ని ప్రభుత్వ ఆస్పత్రులలో ఆధునిక సౌకర్యాలు కల్పించనున్నామని, దీనికి కేంద్ర ప్రభుత్వం నిధులను సమకూరుస్తుందని ఆయన తెలిపారు. ఆంధ్రప్రదేశ్ రాష్ట్రంలోని 13 జిల్లాల్లో సూపర్ స్పెషాలిటీ ఆస్పత్రులను ఏర్పాటు చేయాలని ప్రభుత్వం సంకల్పిస్తోందని కామినేని శ్రీనివాస్ వివరించారు.