ఇప్పటికే వరంగల్ ఉపఎన్నికలో కాంగ్రెస్ ఘోర పరాజయాన్ని మూటగట్టుకుంది. ఇప్పుడు తెలంగాణలో జరగబోయే స్టానిక సంస్థల కోటా ఎన్నికల్లో మాత్రం ఎలాగైనా సీటు సంపాదింటుకోవాలని ప్రయత్నిస్తున్నట్టు తెలుస్తోంది. అయితే టీఆర్ఎస్ దూకుడికి.. తాము ఒంటరిగా పోరాటం చేస్తే మళ్లీ ఓడిపోతామని భావించి ఈసారి టీడీపీతో కలిసి పోటీ చేయాలని భావిస్తున్నారు నేతలు. అయితే టీ కాంగ్రెస్ నేతల ప్రతిపాదనకు కాంగ్రెస్ హైకమాండ్ ఒప్పుకోకపోవచ్చని సంకేతాలు వినిపిస్తున్న నేపథ్యంలో.. స్థానికంగా అవసరాలను బట్టి టీడీపీ మద్దతు తీసుకోవాలని టి కాంగ్రెస్ ముఖ్యనేతలు భావిస్తున్నారట. అంతేకాదు టీడీపీ సహకారం తీసుకోకుండా స్థానిక సంస్థల ఎమ్మెల్సీ ఎన్నికల్లో కాంగ్రెస్ విజయం సాధించే అవకాశం లేదని… కాబట్టి ఎలాగైనా టీడీపీతో ఇచ్చే పుచ్చుకునే ధోరణితోనే నడవాలని టి కాంగ్రెస్ దాదాపుగానే ఓ నిర్ణయానికి వచ్చినట్టు సమాచారం. మరి రెండు పార్టీలు పొత్తు పెట్టుకుంటే టీడీపీకి ఇవ్వాల్సిన సీట్లు గురించి కూడా కాంగ్రెస్ నేతలు చర్చించుకుంటున్నారట. మొత్తానికి కాంగ్రెస్ పార్టీ మాత్రం టీడీపీతో పొత్తు పెట్టుకోవడానికి రెడీగా ఉన్నట్టు తెలుస్తోంది. మరి టీడీపీ కాంగ్రెస్ పార్టీతో పొత్తుకు అంగీకరిస్తుందో లేదో చూడాలి.