జగన్ ఇలా విడుదలై బయటకు రాగానే ఆయనకు తెలంగాణ సెగ తగిలింది. వైఎస్ఆర్ కాంగ్రెస్ పార్టీ యాకుత్ పురా నియోజకవర్గ కన్వీనర్ మైల్ కోల్ మహేందర్ యాదవ్ తెలంగాణ విషయంలో జగన్ వైఖరి తెలపాలంటూ జై తెలంగాణ నినాదాలు చేశారు. తెలంగాణకు అనుకూలమని చెప్పి సమైక్యాంధ్ర కోసం రాజీనామా చేయడం, దీక్ష చేయడానికి నిరసనగా పార్టీకి రాజీనామా చేస్తున్నట్లు ప్రకటించారు. జగన్ వస్తున్న సమయంలో తెలంగాణ నినాదాలు మొదలు కావడంతో మాజీ ఎమ్మెల్సీ రెహమన్, ఇతర నేతలు ఆగ్రహంతో దాడికి ప్రయత్నించారు. అక్కడే ఉన్న ఏసీపీ జోక్యం చేసుకుని మహేందర్ యాదవ్ ను అక్కడి నుండి పంపించారు. దీంతో తెలుగుతల్లి విగ్రహం వద్దకు వెళ్తే పరిస్థితి మరింత ఇబ్బందికరంగా ఉంటుందని భావించి దానిని మానుకున్నారు. ఇక నగరంలో కూడా తెలంగాణ వాదులు నిరసన తెలుపుతారని పోలీసులు భారీ భద్రత ఏర్పాటు చేశారు.