సానియాపై టీ కాంగ్రెస్ తలోమాట: సోనియాకి ఫిర్యాదు!!

సానియా మీర్జా తెలంగాణ బ్రాండ్ అంబాసిడర్‌గా ఎంపిక అంశం మీద తెలంగాణ కాంగ్రెస్ నాయకులు తలోరకంగా స్పందిస్తున్నారు. తమలో తాము తిట్టుకోవడానికి కొత్తపాయింట్ దొరికినందుకు చాలా సంతోషిస్తూ తిట్టుకుంటున్నారు. తెలంగాణ బ్రాండ్ అంబాసిడర్‌గా సానియాని ఎంపిక చేయడం ఏంటంటూ రాజ్యసభ సభ్యులు వి.హనుమంతరావు నిప్పులు చెరిగితే, హనుమంతరావు చేసిన వ్యాఖ్యల మీద టీ పీసీసీ అధ్యక్షుడు, ఎమ్మల్సీ షబ్బీర్ అలీ తీవ్ర ఆగ్రహం వ్యక్తం చేస్తూ సానియా నియామకం నూటికి నూరుశాతం కరెక్ట్ అంటున్నారు. భారతదేశం కోసం అనేక పతకాలు సాధించిన సోనియా కోటి రూపాయలు ఇవ్వడానికి, పదవులు ఇవ్వడానికి అర్హురాలని అన్నారు. సానియా మీద వ్యాఖ్యలు చేసిన హనుమంతరావు మీద తమ అధినేత్రి సోనియాకి ఫిర్యాదు చేసినట్లు ఆయన చెప్పారు. హనుమకు మాట్లాడే స్వాతంత్ర్యం ఉంది కదా అని ఇష్టం వచ్చినట్లు మాట్లాడుతున్నారని ఆయన విమర్శించారు. విహెచ్‌ను కట్టడి చేయాల్సిందిగా ఆయన సోనియాకి రాసిన లేఖలో కోరారు. దీని మీద వీహెచ్ స్పందించారు. తాను తప్పేమి మాట్లాడలేదని అన్నారు. తెలంగాణలో జన్మించిన అజహరుద్దీన్‌ను బ్రాండ్ అంబాసిడర్‌గా నియమించకుండా, ముంబాయిలో జన్మించిన సానియాకు ఎలా ఇస్తారని ప్రశ్నించానని చెప్పారు.