తెలంగాణ ప్రభుత్వం, మెట్రో రైల్ నిర్మాణ పనులు చేస్తున్న ఎల్ అండ్ టి సంస్థ ప్రాజెక్టుకు సంబంధించిన నిజాలను దాచిపెట్టి పత్రికల మీద నింద వేయడం సరైన పద్ధతి కాదని తెలంగాణ భారతీయ జనతాపార్టీ అధ్యక్షుడు కిషన్ రెడ్డి అన్నారు. వాస్తవాలను ప్రచురించే హక్కు పత్రికలకు లేదని ఎలా అంటారని ఆయన ప్రశ్నించారు. మెట్రో ప్రాజెక్టును ఆపేస్తామని ఉత్తర ప్రత్యుత్తరాలు రాసుకుంటే తప్పులేదుగానీ, వాటిని పత్రికలు ప్రచురిస్తేనే తప్పయిందా అని ఆయన ఎల్ అండ్ టీ సంస్థని అడిగారు. మెట్రో రైలు కోసం ఎల్ అండ్ టీ సంస్థ భారీగా ఖర్చు పెట్టిందని, ప్రభుత్వ విధానం వల్ల మెట్రో పనులు ఆగిపోతున్నాయని బీజేపీ నాయకులు అన్నారు. కొన్ని పత్రికల్లో వచ్చిన లేఖ వివరాలు నిజమో కాదో ఎల్ అండ్ టీ సంస్థ స్పష్టం చేయాలని వారు డిమాండ్ చేశారు. మెట్రో రైలు ప్రాజెక్టుపై ప్రభుత్వం శ్వేతపత్రం విడుదల చేయాలని విజ్ఞప్తి చేశారు. ఎల్ అండ్ టీ సంస్థని ఎవరైనా బ్లాక్ మెయిల్ చేస్తున్నట్టయితే వారి పేర్లను బయటపెట్టాలని డిమాండ్ చేశారు.