పోలవరం ముంపు మండలాలను ఆంధ్రప్రదేశ్‌లో కలపడాన్ని వ్యతిరేకిస్తూ శనివారం నాడు తెలంగాణ రాష్ట్రంలో బంద్ జరుగుతోంది. పోలవరం ప్రాజెక్టు నిర్మాణానికి అనుకూలంగా ఏడు మండలాలను ఆంధ్రప్రదేశ్‌లో కలుపుతూ బిల్లును ఆమోదించడాన్ని వ్యతిరేకిస్తూ భారత కమ్యూనిస్టు పార్టీ మార్క్సిస్టు (సీపీఎం) బంద్‌కు పిలుపు ఇచ్చింది. అధికారంలో వున్న టీఆర్ఎస్ పార్టీ కూడా ఈ బంద్‌కి మద్దతు ఇవ్వడం విశేషం. కాంగ్రెస్, తెలంగాణ పొలిటికల్ జేఏసీ ఇతర ప్రజాసంఘాలు బంద్‌కి సంపూర్ణ మద్దతు ప్రకటించాయి. బంద్ కారణంగా తెలంగాణ వ్యాప్తంగా ఆర్టీసీ బస్సులు డిపోలకే పరిమితమయ్యాయి. రవాణా స్తంభించింది. పోలవరం ముంపు మండలాలున్న ఖమ్మం జిల్లాలో బంద్ ప్రభావం తీవ్ర స్థాయిలో వుంది.