తనపై అత్యాచారం చేయబోయిన ఓ యువకుడి నాలుకను కొరికేసింది ఓ యువతి. ఉత్తర ప్రదేశ్ లోని బర్తానా ప్రాంతంలో ఈ ఘటన చోటుచేసుకుంది. కైలాష్ బహేలియా అనే యువకుడు పదిహేడేళ్ల ఓ యువతి ఇంట్లోకి ప్రవేశించి ఆమెపై అత్యాచారానికి ప్రయత్నించాడు. ఆ యువతి తనను తాను రక్షించుకునేందుకు ఆ యువకుడి నాలుకను తన పళ్లతో రెండు ముక్కలుగా కొరికేసింది. రక్తం కారుతున్న నాలుకతో ఆ యువకుడు వెంటనే బయటకు పరుగెత్తాడు. సమాచారం అందుకున్న పోలీసులు అతనిని అరెస్టు చేశారు. నాలుకలోని కొద్ది భాగం తెగిపోయందని, ఆ యువకుడు జీవితాంతం స్పష్టంగా మాట్లాడలేడని వైద్యులు తెలిపారు. నాలుక కొరికనందుకు పశ్చాత్తాప పడటం లేదని, తప్పని పరిస్థితుల్లోనే అలా చేశానని ఆ యువతి పేర్కొంది.