లైంగిక వేధింపుల వివాదంలో ఇరుక్కున్న సత్యవేడు టీడీపీ ఎమ్మెల్యే కోనేటి ఆదిమూలం  పార్టీ నుంచి సస్పెండ్  అయ్యారు.  ఈ మేరకు తెలుగుదేశం పార్టీ ఆంధ్రప్రదేశ్ అధ్యక్షుడు పల్లా శ్రీనివాసరావు సస్పెన్షన్ నిర్ణయాన్ని ప్రకటించారు. సత్యవేడు తెలుగుదేశం ఎమ్మెల్యే కోనేటి ఆదిమూలం తనను లైంగికంగా వేధించినట్లుగా ఓ మహిళ చేసిన ఆరోపణలపై ఈ చర్య తీసుకున్నారు.  ఆదిమూలంపై ఆరోపణల విషయం చంద్రబాబు దృష్టికి రాగానే ఆయన సీరియస్ అయ్యారు. ముందు సస్పెండ్ చేయండి, ఆ తరువాత వివరణ తీసుకుందామంటూ పార్టీ రాష్ట్ర అధ్యక్షుడిని ఆదేశించారు.  

చంద్రబాబు నిర్ణయం పట్ల సర్వత్రా హర్షం వ్యక్తం అవుతోంది. వైసీపీ హయాంలో ఇటువంటి ఆరోపణలు ఎదుర్కొన్న వారిపై కనీస చర్యలు తీసుకోకుండా వారిని జగన్ వెనకేసుకు వచ్చిన సంగతిని గుర్తు చేస్తూ చంద్రబాబు తప్పులను ఇసుమంతైనా ఉపేక్షించరనడానికి ఆదిమూలంపై తక్షణ చర్యే నిదర్శనం అంటున్నారు. వైసీపీ అధికారంలో ఉన్న సమయంలో అంబటి రాంబాబు, అవంతి, గోరంట్ల వంటి నాయకులపై ఆరోపణలు వచ్చినా పార్టీ పరంగా వారిపై జగన్ ఎటువంటి చర్యలూ తీసుకోని విషయాన్ని గుర్తు చేస్తూ, చంద్రబాబు తమ పార్టీ నేతల క్యారెక్టర్ విషయంలో చాలా కచ్చితంగా ఉంటారని తెలుగుదేశం నేతలు చెబుతున్నారు.