అవాంతరాలు ఎదురైనా వెనక్కి తగ్గేది లేదు :బాబు
Published on: Fri Jan 6, 2012 2:21PM
వరంగల్: తెలుగు
దేశం పార్టీ అధ్యక్షుడు నారా చంద్రబాబు నాయుడు వరంగల్ జిల్లా పర్యటనలో తెలంగాణ రాష్ట్ర సమితి ను లక్ష్యంగా చేసుకుని మాట్లాడారు .తెలంగాణలో ఉప ఎన్నికల ప్రచారానికి తానే నేరుగా వస్తానని ,ఎన్ని అవాంతరాలు ఎదురైనా తాను వెనక్కి తగ్గేది లేదని ఆయన తేల్చి చెప్పారు. ఇక తెరాస ఆటలు సాగవని ఆయన హెచ్చరించారు. తెరాస కన్నా తమ పార్టీకే తెలంగాణలో పటిష్టమైన నాయకత్వం ఉందని ఆయన అన్నారు. కొన్ని రాజకీయ పరిణామాల ప్రభావం వల్ల తన తెలంగాణ పర్యటనలో జాప్యం జరిగిందని ఆయన చెప్పారు.తెలంగాణ జిల్లాల్లో క్రమం తప్పకుండా పర్యటిస్తానని ఆయన చెప్పారు. తెరాసకు విధివిధానాలు లేవని , తెరాస కావాలనే గిల్లికజ్జాలు పెట్టుకుంటోందని ఆయన అన్నారు. రైతు సంక్షేమం కోసం తాను వస్తున్నానని ఆయన అన్నారు.
ఉప ఎన్నికల్లో తమ పార్టీ అన్ని సీట్లకు పోటీ చేస్తుందని ఆయన చెప్పారు. రైతులపై ప్రేమ ఉంటే వారు కూడా పోరాడాలని, వారు పోరాడకుండా పోరాడేవారిపై దాడికి దిగుతున్నారని ఆయన అన్నారు. రాజకీయంగా తమను ఎదుర్కోలేక అలా చేస్తున్నారని ఆయన అన్నారు. ప్రజల కష్టనష్టాలు తెలుసుకునేందుకు వస్తుంటే తెలంగాణ అంటూ అడ్డుకుంటున్నారని ఆయన అన్నారు. తాను తెలంగాణకు వ్యతిరేకం కాదని చెప్పినా అడ్డుకుంటే ఎలా అని ఆయన అడిగారు. లక్ష్మక్కపల్లి నుంచి ఆయన తన రైతు పోరుబాటను ప్రారంభించారు. తెలుగుదేశం పార్టీపై ప్రజలకు అచంచల విశ్వాసం ఉందని ఆయన చెప్పారు.


