గత కొద్దిరోజులుగా టీడీపీ నేత సుజనా చౌదరి బీజేపీలో చేరుతున్నారని వార్తలు వస్తున్న సంగతి తెలిసిందే. అయితే ఈ వార్తలపై స్పందించిన సుజనా చౌదరి..అబ్బే అదేం లేదు... తాను ఏ పార్టీలోకి వెళ్లడం లేదని చెప్పుకొచ్చారు. కానీ సుజనా అలా చెపుతున్నా ఆయన చేసే పనులు.. వైఖరి చూస్తుంటే మాత్రం ఈవార్తల్లో ఎంతో కొంత నిజం ఉందన్న అనుమానాలు రాక తప్పదు. ఇప్పుడు చంద్రబాబు మాటలు కూడా సుజనా లెక్కచేయట్లేదన్న వార్తలు వస్తున్నాయి. తెలుగు దేశం పార్టీ విస్తృత స్థాయి సమావేశానికి ఎట్టి పరిస్థితిల్లోనూ పార్టీలోని ముఖ్య నేతలు రావాల్సిందేనని చంద్రబాబు ఆదేశాలు జారీ చేశారట. కానీ సుజనా మాత్రం ఆయన ఆదేశాల్ని బేఖాతరు చేస్తూ సమావేశానికి డుమ్మా కొట్టారట. దీంతో బీజేపీతో టీడీపీ కలిసున్నంత కాలం ఇరు పార్టీల మధ్య కీలకంగా వ్యహిరించిన సుజనా.. ఇప్పుడు భేటీకి రాకపోవడంతో సర్వత్రా చర్చనీయాంశంగా మారింది. ఎన్డీయేలో టీడీపీ ఉన్నప్పుడు అత్యంత క్రియాశీలకంగా వ్యవహరించిన సుజనా.. ఎప్పుడైతే టీడీపీ బీజేపీతో కటీఫ్ అయిందో అప్పటినుండి పార్టీ కి సంబంధించిన సమావేశాల్లో పెద్దగా కనిపించకుండా పోయారు. ఇక ఇప్పుడు ఏకంగా చంద్రబాబు ఆదేశాన్నే పట్టించుకోకుండా ఇలా చేయడంతో.. రేపో మాపో తాను బీజేపీలో చేరుతున్నానని చెప్పడానికే సుజనా ఇలా చేస్తున్నాడేమో అని అనుకుంటున్నారు.