వరంగల్, నల్గొండ, ఖమ్మం, కృష్ణాజిల్లాలో బుధవారం రాత్రి విచిత్రమైన పుకారు షికారు చేసింది. బుధవారం నాడు నిద్రపోయినవాళ్ళు చనిపోతారని పుకార్లు వ్యాపించాయి. దాంతో చాలామంది జనం నిద్ర పోవడం మానేసి రోడ్లమీదకి చేరి కాలక్షేపం చేశారు. బుధవారం అర్ధరాత్రి ఈ పుకారు వ్యాపించింది. దాంతో అర్ధరాత్రి నుంచి జనం రోడ్ల మీదే సెటిలయ్యారు. కాస్తంత బుర్రున్నవాళ్ళు ఇవన్నీ పుకార్లని, ఇళ్ళలోకి వెళ్ళి హాయిగా నిద్రపొండని చెప్పినా జనం వినలేదు. అలా చెప్పినవాళ్ళనే పిచ్చోళ్ళని చూసినట్టు చూశారు. చాలామంది పెద్దలు నిద్ర మానుకుని కూర్చోవడమే కాకుండా ఈ మూఢ నమ్మకం గురించి పట్టించుకోకుండా హాయిగా నిద్రపోతున్న పిల్లల్ని కూడా నిద్రలేపి కూర్చోపెట్టారు. నిద్రపోతే చనిపోరు... నిద్రపోకపోతేనే చనిపోతారన్న నిజం ఈ జనాలకి ఎప్పటికి తెలుస్తుందో ఏంటో!