సంచలన సినీ నటి షకీలా పెళ్ళి అయిపోయిందా? అవునంటూ బుధవారం నాడు ఇంటర్నెట్‌లో భారీ స్థాయిలో ప్రచారం జరిగింది. షకీలాతోపాటు మరో యువకుడు ఉన్న ఫొటోను చూపిస్తూ ఇతనితో షకీలా పెళ్ళయిపోయిందని వార్తలు వచ్చాయి. అయితే షకీలాకి గతంలో ఒకసారి పెళ్ళయింది. ఆ తర్వాత ఆ పెళ్ళి పెటాకులు అయిపోయింది. ఇప్పుడు ఆమె మరోసారి పెళ్ళిచేసుకుందన్న వార్తలు వచ్చాయి. అయితే షకీలా ఈ వార్తలను ఖండించింది. 38 ఏళ్ళ వయసున్న తాను 28 ఏళ్ళ వయసున్న ఆ కుర్రాడిని పెళ్ళి చేసుకున్నట్టు వచ్చిన వార్తలు అవాస్తవాలని షకీలా పేర్కొంది. అతను తాను దర్శకత్వం వహిస్తున్న సినిమా కథానాయకుడని, అంతే తప్ప తన జీవిత కథానాయకుడు కాదని షకీలా స్పష్టం చేసింది. అతను తన తమ్ముడు లాంటివాడని, ఇలాంటి లేనిపోని పుకార్లు రేపి అతని జీవితంలో ఆడుకోవద్దని షకీలా విజ్ఞప్తి చేసింది. తన జీవితంలో ఇక పెళ్ళి అనే మాటే లేదని, పెళ్ళి చేసుకుని, పిల్లల్ని కని భూమి భారాన్ని పెంచడం తనకు ఇష్టం లేదని షకీలా స్పష్టం చేసింది.