ప్రభుత్వాలు, పోలీసులు ఎన్ని ముందు జాగ్రత్త చర్యలు తీసుకున్నా మహిళల మీద అత్యాచారాలు ఆగడం లేదు. దేశ రాజధాని ఢిల్లీలో ఇలాంటి మరో ఘోరం జరిగింది. పదో తరగతి చదువుతున్న విద్యార్థిని మీద ఐదుగురు సామూహిక అత్యాచారానికి పాల్పడ్డారు. ఈ సంఘటన ఈనెల 19వ తేదీన జరిగింది. అయితే ఈ విషయాన్ని ఇంతకాలం గుండెలో అదుముకుని కుమిలిపోతున్న బాధితురాలు చివరికి పోలీసులకు ఫిర్యాదు చేయాలని నిర్ణయించుకుంది. పోలీసులు ఈ కేసును నమోదు చేశారు. బడికి వెళ్తున్న ఈ బాలికని ఐదుగురు వ్యక్తులు కిడ్నాప్ చేసి, అత్యాచారం జరిపారు. ఈ తతంగాన్ని వీడియో తీసి ఈ విషయాన్ని ఎవరికైనా చెబితే వీడియోను ఇంటర్నెట్‌లో పెడతామని ఆ బాలికని బెదిరించారు. అయితే ఆ బాలిక తెగువ ఈ విషయం వెలుగులోకి వచ్చింది. అత్యాచారానికి పాల్పడిన ఐదుగురు యువకులలో ముగ్గురిని పోలీసులు అరెస్టు చేశారు. మరో ఇద్దరి కోసం గాలిస్తున్నారు.