నిమ్మగడ్డ వ్యవహారం.. సుప్రీంకోర్టు మళ్లీ అదే మాట
Published on: Thu Jun 18, 2020 3:52PM
ఏపీ ప్రభుత్వం ఎలక్షన్ కమిషనర్ నిమ్మగడ్డ రమేష్ కుమార్ కు ఎటువంటి పరిస్థితుల్లోనూ బాధ్యతలు అప్పగించకుండా ఉండడానికి విశ్వ ప్రయత్నం చేస్తూనే ఉంది. నిమ్మగడ్డకు తిరిగి బాధ్యతలు అప్పగించాలని హైకోర్టు ఇచ్చిన తీర్పు పై స్టే కోసం రాష్ట్ర ప్రభుత్వం సుప్రీం కోర్ట్ ను ఆశ్రయించగా కోర్టు నిరాకరించిన విషయం తెలిసిందే. ఐతే ఇదే విషయమై మరోసారి ఏపీ ఎలక్షన్ కమిషన్ కార్యదర్శి ద్వారా పిటిషన్ వేయించింది. తాజాగా దీని పై సిజెఐ తో కూడిన ధర్మాసనం సుప్రీం కోర్టు లో వీడియో కాన్ఫరెన్స్ ద్వారా విచారణ జరిపింది. హైకోర్టు ఇచ్చిన తీర్పు పై స్టే ఇవ్వడానికి నిరాకరిస్తూ ప్రతి వాదులకు మాత్రం నోటీసులు జారీ చేసింది. ఆదే సమయంలో ఏపీ ప్రభుత్వం వేసిన పిటిషన్ తో కలిపి విచారణ చేపడతామని తెలిపింది. ఇప్పటికే హైకోర్టు తీర్పులో ఉన్న సాంకేతిక అంశాల ఆధారంగా గతంలో నిమ్మగడ్డ నియామకమే చెల్లదని సుప్రీం కోర్టులో ఏపీ సర్కార్ వాదించింది.


