ఆర్థిక శాఖ కార్యదర్శి సందీప్  సుల్తానియాను.. అరెస్ట్ చేసి ప్రవేశపెట్టాలని సీపీకి ఆదేశాలు..!

తెలంగాణ రాష్ట్ర ఉన్నతాధికార వర్గాల్లో తీవ్ర కలకలం రేగింది. న్యాయస్థాన ఉత్తర్వులను అమలు చేయకుండా కోర్టు ధిక్కరణకు పాల్పడిన వ్యవహారంలో రాష్ట్ర ఆర్థిక శాఖ ముఖ్యకార్యదర్శి సందీప్ కుమార్ సుల్తానియాను వెంటనే అరెస్ట్ చేయాలని తెలంగాణ హైకోర్టు సంచలన ఆదేశాలు జారీ చేసింది.

ఈ వ్యవహారాన్ని తీవ్రంగా పరిగణించిన జస్టిస్ నగేశ్ భీమపాక ధర్మాసనం సంచలన తీర్పు వెలువరించింది. సందీప్ కుమార్ సుల్తానియాను ఎక్కడ ఉన్నా అదుపులోకి తీసుకుని, వెంటనే తమ ముందు ప్రవేశపెట్టాలని హైదరాబాద్ పోలీస్ కమిషనర్‌ను ఆదేశించింది.

సికింద్రాబాద్ కంటోన్మెంట్ బోర్డు నిధులకు సంబంధించిన బకాయిలు, నిధుల విడుదల అంశంలో గతంలో హైకోర్టు కీలక తీర్పు ఇచ్చింది. అయితే, ఆ ఆదేశాలను అమలు చేయడంలో ఆర్థిక శాఖ నిర్లక్ష్యం వహించిందని, తీర్పును కాలరాసేలా వ్యవహరించారనే అభియోగంపై న్యాయస్థానం ఈ తీవ్ర నిర్ణయం తీసుకుంది.

గతంలోనే ఈ అంశంపై సదరు అధికారికి బెయిలబుల్ వారెంట్ జారీ అయినప్పటికీ సరైన స్పందన రాకపోవడంతో కోర్టు మరింత కఠినంగా వ్యవహరించింది. శుక్రవారం ఉదయం 10:30 గంటలకల్లా ఐఏఎస్ అధికారిని కోర్టు ముందు ప్రవేశపెట్టాలని సీపీని ఆదేశించింది.

ఒకవేళ తాను స్వయంగా కోర్టుకు హాజరవుతానని హామీ ఇస్తూ రూ. 5 వేల విలువైన వ్యక్తిగత బాండ్ సమర్పిస్తేనే బెయిల్‌పై విడుదల చేయాలని స్పష్టం చేసింది. అంతేకాకుండా, తదుపరి ఉత్తర్వులు వెలువడే వరకు జరిగే ప్రతి విచారణకూ సదరు అధికారి స్వయంగా హాజరుకావాల్సిందేనని తేల్చిచెప్పింది.

ఉన్నత స్థాయి ఐఏఎస్ అధికారిపై న్యాయస్థానం నేరుగా అరెస్ట్ వారెంట్ తరహా ఆదేశాలు ఇవ్వడం సచివాలయంలోనూ, పోలీసు యంత్రాంగంలోనూ పెద్ద చర్చనీయాంశంగా మారింది. న్యాయస్థాన ఆదేశాలను నిర్లక్ష్యం చేసే అధికారులకు ఇది ఒక హెచ్చరిక లాంటిదని న్యాయ నిపుణులు పేర్కొంటున్నారు.

ఈ పరిణామంతో సివిల్ సర్వెంట్ల వర్గాల్లో తీవ్ర ఉత్కంఠ నెలకొంది. ఈ కేసులో సదరు అధికారి న్యాయస్థానం ముందు ఎలాంటి వివరణ ఇస్తారు, హైకోర్టు తదుపరి ఏ విధమైన నిర్ణయం తీసుకోనుంది అనేది ఇప్పుడు రాష్ట్ర వ్యాప్తంగా తీవ్ర ఆసక్తికరంగా మారింది.

Sandeep Kumar Sultanian, Telangana High Court, Contempt of Court Case,  Hyderabad Police Commissioner, Secunderabad Cantonment Board, CM Revanth reddy