తమ వేతనసవరణలు చేయాలని ఆర్టీసీ కార్మిక సంఘాలు సమ్మె చేస్తున్న సంగతి తెలిసిందే. ఈ సమస్య పరిష్కారంలో తెలంగాణ ముఖ్యమంత్రి కేసీఆర్ ఆర్టీసీ కార్మికులకు 40 శాతం ఫిట్మెంట్ ఇవ్వాలని యోచిస్తున్నారు. ఒకవేళ అలా ఇచ్చినట్టయితే కేసీఆర్ ఆంధ్ర ముఖ్యమంత్రి చంద్రబాబునాయుడిని చిక్కుల్లో పడేసినట్టే. అసలే ఆర్ధికలోటులో ఉన్న ఆంధ్రప్రదేశ్ ను ఇబ్బందుల్లోకి నెట్టడానికే కేసీఆర్ చూస్తున్నారని ఆంధ్ర మంత్రులు అంటున్నారు. గతంలో కూడా కేసీఆర్ ప్రభుత్వ ఉద్యోగులకు 43 శాతం ఫిట్మెంట్‌ను ప్రకటించారు. దాంతో ఇక్కడ ఆంధ్రా ఉద్యోగులు కూడా తమకు పెంచాలని కోరడంతో పెంచాల్సి వచ్చిందని, ఇప్పుడు కూడా కేసీఆర్ అలానే చేస్తున్నారని చంద్రబాబు అన్నారు. అయితే ఇప్పుడు మాత్రం ఆంధ్రప్రదేశ్ ఆర్ధిక పరిస్థితి అంత బాలేదు కాబట్టి కేసీఆర్ పెంచినంత వేతనాలు పెంచలేమని చంద్రబాబు వెల్లడించారు.