‘గాంధీ’ దర్శకుడు రిచర్డ్ అటెన్‌బరో కన్నుమూత

ప్రముఖ బ్రిటీష్ దర్శకుడు, నటుడు, నిర్మాత, ఆస్కార్ అవార్డు విజేత ‘గాంధీ’ చిత్ర దర్శకుడు రిచర్డ్ అటెన్‌బరో లండన్‌లో కన్నుమూశారు. ఆయన వయసు 90 సంవత్సరాలు. మహాత్మాగాంధీకి నివాళిగా ఆయన రూపొందించిన ‘గాంధీ’ సినిమా ప్రపంచ వ్యాప్తంగా సంచలన విజయం సాధించింది. అనేక ఆస్కార్ అవార్డులను కూడా పొందింది. ఆగస్టు 29, 1923న ఇంగ్లండ్‌లోని కేంబ్రిడ్జ్‌లో అటెన్‌బరో జన్మించారు. తన 91వ పుట్టినరోజుకు నాలుగు రోజుల ముందు కన్నుమూశారు. ‘గాంధీ’ చిత్రానికి దర్శకత్వం వహించిన ఆయన స్టీవెన్ స్పీల్ బర్గ్ రూపొందించిన ‘జురాసిక్ పార్క్’ సినిమాలో జురాసిక్ పార్క్ ఓనర్‌గా నటించారు. అటెన్‌బరో తల్లి సినిమా నేపథ్యంతో వుండేవారు. నాలుగేళ్ళ వయసులో నటుడిగా అటెన్‌బరో సినిమా రంగప్రవేశం చేశారు. రిచర్డ్ అటెన్‌బరో మరణంతో బ్రిటీష్ సినిమా రంగంలో ఒక సువర్ణాధ్యాయం ముగిసింది.