మహబూబ్‌నగర్‌ జిల్లా తలకొండ మండలం చల్లంపల్లిలో 25ఎకరాల 26గుంటల భూమిని ఆక్రమంగా రిజిస్ట్రేషన్‌ చేసుకున్న భానుకిరణ్‌, డి.కృష్ణలతో పాటు స్థలయజమాని తుమ్మల సునీతను కూర్చోపెట్టి తెలుగుదేశం కొండగల్‌ ఎమ్మెల్యే రేవంత్‌రెడ్డి సెటిల్‌మెంట్‌ చేశారని సిబిసిఐడి వెల్లడిరచింది. దీనికి సరైన ఆధారాలు లభించాయని ఆ విచారణ సంస్థ స్పష్టం చేసింది. భానుకిరణ్‌కు సంబంధించిన అన్ని భూదందాలపై సిబిసిఐడి విచారణ చేస్తోంది. దానిలో భాగంగానే ఈ భూవివాదం పూర్తి వివరాలను సేకరించింది. మహబూబ్‌నగర్‌ జిల్లా తలకొండ మండలం చల్లంపల్లిలో తుమ్మల సునీత, ఆమె తండ్రి బోజిరెడ్డిలు ఈ 25ఎకరాల భూమిని కొనుగోలు చేశారు. కొంత కాలం తరువాత సునీత అమెరికా వెళ్లిపోయారు. హైదరాబాద్‌లోనే ఉంటూ ఫైనాన్స్‌ వ్యాపారం చేసుకునే బోజిరెడ్డి అకస్మాత్తుగా మృతి చెందారు. సునీతకు చెందిన ఈ భూడాక్యుమెంట్లు భాను సంపాదించాడు. ఆయన ఆ భూమిని కాజేసేందుకు పథకం రచించాడు. వేరే మహిళను సునీత స్థానంలో చూపించి ఆమెను తీసుకువెళ్లి తమ పేరిట రిజిస్ట్రేషను చేయించుకున్నారు. డి.కృష్ణ, భాను చేసిన ఈ పని తెలుసుకున్న రేవంత్‌రెడ్డి సునీతను అమెరికా నుంచి రప్పించారు. తానే దగ్గర ఉండి వ్యవహారాన్ని సెటిల్‌ చేశారు. అయితే తన ప్రమేయం లేదని రేవంత్‌రెడ్డి అంటున్నారు.