ముఖ్యమంత్రి కేసీఆర్, వ్యూహం ఏమిటో కానీ, ఆయన ‘మోర్ లాయల్ ద్యాన్ ద కింగ్’ తరహాలో, కాంగ్రెస్ పార్టీ నాయకులు కార్యకర్తల కంటే ఎక్కువగా రాహుల్‌ గాంధీని, నెహ్రూ గాంధీ ఫ్యామిలీని తెగ పొగిడేస్తున్నారు. రాహుల్ గాంధీ పుట్టుకకు సంబంధించి అసోం ముఖ్యమంత్రి హేమంత్ బిశ్వ శర్మ చేసిన అసభ్య వ్యాఖ్యలను ఖండించారు. అంతే కాదు, అయన తరపున ఈయనే పోరాటం చేస్తున్నట్లు బిల్డప్ ఇచ్చారు. 

అదలా ఉంటే, తెరాస ఎమ్మెల్సీ కల్వకుట్ల కవిత మరో అడుగు ముందుకేసి, కేసీఆర్ విశాల హృదయాన్ని ట్విట్టర్’లో పరిచే ప్రయత్నం చేశారు. రాహుల్ గాంధీ, కాంగ్రెస్ పార్టీ నాయకత్వాన్ని బీజేపీ అవమానించిన సమయంలో కేసీఆర్ కాంగ్రెస్ నాయకులకు అనుకూలంగా మాట్లాడారని, రాజకీయాలకు అతీతంగా దేశంలో గౌరవప్రదమైన రాజకీయాలను కేసీఆర్ నిలబెట్టారని కవిత ట్వీట్ చేశారు. అది కేసీఆర్ గొప్పతనం అన్నట్లుగా బిల్డప్ ఇచ్చారు. అయితే, ఈ ట్వీట్ కు పీసీసీ చీఫ్ రేవంత్ రెడ్డి అదే ట్విట్టర్ వేదికగా, అంతే జబర్దస్త్’గా  కౌంటరిచ్చారు. 

మొసలి కన్నీరు కార్చడంలో మీ పార్టీ నాయకత్వం ప్రావీణ్యం సాధించిందని పరోక్షంగా కేసీఆర్ పై రేవంత్ సెటైర్లు వేశారు.. తెలంగాణ కోసం ప్రాణ త్యాగాలు చేసిన అమరులను, తెలంగాణ తల్లిని ప్రధాని నరేంద్ర మోడీ  అవమానించినప్పుడు మీ నాయకుడు ఎందుకు మౌనంగా ఉన్నారని తెలంగాణ ప్రజలు అడుగుతున్నారని రేవంత్ రెడ్డి ప్రశ్నించారు.

అంతకు ముందు కూడా కాంగ్రెస్ పార్టీ తెలంగాణ రాష్ట్ర వ్యవహారాల ఇంచార్జీ మాణిక్ టాగోర్  కు ఎమ్మెల్సీ కల్వకుంట్ల కవితకు మధ్య ట్వీట్ వార్ జరిగింది. కొట్లాది మంది తెలంగాణ యువత, సోనియా గాంధీ కోరుకున్న తెలంగాణ కోసం పని చేస్తూనే ఉంటుంది అది నెరవేరాలంటే  ఊసరవెల్లి టీఆర్‌ఎస్, మతతత్వ బీజేపీని ఓడించాలి. ఈ రెండు పార్టీలు ఒకే నాణేనికి 2 పార్శ్వాలు. కాంగ్రెస్ పార్టీ ఆ పని చేయగలదని మాణికం ఠాగూర్  చేసిన ట్వీట్ కు  కవిత స్పందించారు. ప్రజల పోరాటం ద్వారానే తెలంగాణ రాష్ట్ర ఏర్పాటు సాకారమైందని కవిత చెప్పారు. తెలంగాణ సాధన కోసం కేసీఆర్, టీఆర్ఎస్ పార్టీ ఆధ్వర్యంలో ప్రజా పోరాటం సాగిన విషయాన్ని ఆమె గుర్తు చేశారు.

అదలా ఉంటే కేసీఆర్’కు కాంగ్రెస్ మీద ఒక్కసారిగా ఇంత ప్రేమ ఎలా పుట్టుకొచ్చింది అనే విషయంలో రాజకీయ వర్గాల్లో చర్చ జరుగుతూనే ఉంది. తెరాస ప్రభుత్వ వ్యతిరేక ఓటును కాంగ్రెస్ నుంచి బీజేపీ తరలించెందుకే కేసీఆర్, కాంగ్రెస్ పార్టీఫై ప్రేమ నటిస్తున్నారని కాంగ్రెస్ నాయకులు అంటున్నారు. మరో వంక బీజేపీ, కాంగ్రెస్,తెరాస ఒకటే అంటున్నారు.