కేటీఆర్ చప్రాసి ఉద్యోగానికీ కూడా పనికిరాడు.. రేవంత్ రెడ్డి
Published on: Sat Jan 2, 2016 5:12PM

తెలంగాణ టీడీపీ నేత రేవంత్ రెడ్డి టీఆర్ఎస్ మంత్రి కేటీఆర్ పై తీవ్రస్థాయిలో మండిపడ్డారు. కేటీఆర్ ముఖ్యమంత్రి కేసీఆర్ కొడుకు కాకపోతే తెలంగాణలో చప్రాసి ఉద్యోగానికీ కూడా అర్హుడు కాదని అన్నారు. ఈ సందర్బంగా ఆయన గ్రేటర్ ఎన్నికల ప్రచారం గురించి ప్రస్తావిస్తూ గ్రేటర్ ఎన్నికల్లో టిఆర్ఎస్ తరఫున కెటిఆర్ ప్రచారం చేస్తే టిడిపి నుంచి నేను వస్తానని.. టిఆర్ఎస్ నుంచి కెసిఆర్ వస్తే టిడిపి నుంచి చంద్రబాబు వస్తారన్నారని వ్యాఖ్యానించారు. తెలంగాణలో బీసీల ఆత్మగౌరవాన్ని నిలిపింది ఎన్టీఆరేనని.. ఎన్టీఆర్ జయంతి, వర్ధంతిలను అధికారికంగా నిర్వహించాలని డిమాండ్ చేశారు. అక్కడితో కాకుండా గతంలో కేసీఆర్ ఆంధ్రా బిర్యానిని పేడ బిర్యాని అని విమర్శించగా.. ఇప్పుడు రేవంత్ రెడ్డి దానిని గుర్తు చేస్తూ.. కేసీఆర్ ఆంధ్రా బిర్యాని పేడ బిర్యాని అన్నారు.. ఇప్పుడు అమరావతి వెళ్లి అదే పేడ బిర్యాని తిని వచ్చారు అని ఎద్దేవ చేశారు. మరి ఇద్దరు సీఎంలు సన్నిహితంగా మెలుగుతున్న వేళ.. రేవంత్ రెడ్డి ఇలాంటి వివాదాస్పద వ్యాఖ్యలు చేయడంతో ఎలాంటి పరిణామాలు ఎదురవుతాయో అని రాజకీయ వర్గాలు చర్చించుకుంటున్నాయి. మరి రేవంత్ వ్యాఖ్యలకు కేసీఆర్.. కేటీఆర్ ఎలా స్పందిస్తారో చూడాలి.


