ఊరిస్తూ.. ఊరిస్తూ.. ఎలాగో తాను రాజకీయాల్లోకి వస్తున్నా అని తమిళనాడు సూపర్ స్టార్ రజనీకాంత్ చెప్పేశారు. ఎప్పటినుండో ఎదురుచూస్తున్న అభిమానుల కోరికను ఎట్టకేలకు రజనీకాంత్ నిజం చేశారు. ఇక అందరిలాగానే... దేశ రాజకీయాలు భ్రష్టు పట్టిపోయాయని.. వాటిని ప్రక్షాళన చేయాల్సిన అవసరం ఉందని.. డబ్బు, పదవి మీద ఆశతో మాత్రం రాజకీయాల్లోకి రావడం లేదని చెప్పుకొచ్చారు. ఇక్కడివరకూ బాగానే ఉంది. ఇప్పటివరకూ రజనీ ఎప్పుడు రాజకీయాల్లోకి వస్తారబ్బా అని చర్చలు జరిగేవి. ఇప్పుడు ఎలాగూ క్లారిటీ వచ్చేసింది కాబట్టి.. ఆ ఎపిసోట్ అయిపోయింది.

 

ఇప్పుడు పార్టీ సింబల్ పై చర్చలు మొదలయ్యాయి. ముందు చాలా స్టైల్ గా పిడికిలి బిగించి చూపుడు వేలు..చిటికెన వేలు మాత్రమే పైకి లేపిఉంచి బాబా అనే సింబల్ ను పార్టీ గుర్తుగా పెట్టారు. ఈ గుర్తు అయితే ఆధ్యాత్మిక భావన కలుగ చేస్తుంది.. అంతేకాదు తమిళ ప్రజలకి ఈ గుర్తు ఎంతో ప్రాచుర్యం పొందింది కూడా.. అందులో తామరపువ్వు కూడా ఉంది. అయితే రజనీ రాజకీయ ప్రవేశం వెనుక బీజేపీ హస్తం ఉందని కొందరు ప్రచారం చేస్తుండటంతో తామరపువ్వును తొలగించి బాబా ముద్ర చుట్టూ ఒక పామును చేర్చిన బొమ్మ తాజాగా ప్రచారంలోకి వచ్చింది. అయితే పార్టీ పేరును, చిహ్నాన్ని ఎప్పుడు ప్రకటిస్తారన్నది మాత్రం ఇంకా తెలీదు.

 

ఇప్పుడు ఇంకో అంశంపై ఆసక్తికరమైన చర్చ జరిగింది. అసలు రజనీ ఆ సింబల్ ను ఎందుకు ఎంచుకున్నారు.. దాని వెనుక ఉన్న సీక్రెట్ ఏంటీ అని. అయితే ఈ చర్చల్లో కొన్ని ఆసక్తికర విషయాలే బయటపడ్డాయి. మధ్య వేలు, ఉంగరం వేలు ని మడిచి బొటన వేలు కింద నొక్కి ఉంచి, చూపుడు వేలు , చిటికెన వేలు పైకి లేపి ఉంచడమే ఆపాన ముద్ర. ఈ ముద్ర మనిషిలోని కల్మషాన్ని భౌతికంగా, శారీరకంగా తొలిగించడానికి ఎంతగానో ఉపయోగపడుతుంది. పిత్త,అగ్ని సంబంధం అయిన అనారోగ్యం దరి చేరకుండా ఈ ముద్ర ఎంతగానో ఉపయోగపడుతుందట. శరీరంలోని వ్యర్ధాలను బయటకు పంపించడంతో పాటు గ్యాస్ , కడుపు ఉబ్బరం, జీర్ణ సమస్యలు, పైల్స్, గుండె పోటు నుంచి మనిషిని రక్షించడానికి ఈ ముద్ర ఎంతగానో సాయపడుతుందట. ఉదరం లో మొదలై గుండె దాకా వెళ్లే ఆరోగ్య సమస్యలపై ఈ ముద్ర తిరుగులేని అస్త్రమట. ఒకప్పుడు ఈ తరహా సమస్యలు ఎదుర్కొన్న రజని వాటి నుంచి బయటపడేందుకు ఈ ముద్ర ఎంతో ఉపయోగపడిందట. అందుకే సమయం తప్ప ఏ ఖర్చు లేని ఈ ముద్రకి ప్రచారం కల్పించే ఉద్దేశంతోటే దాన్ని పార్టీ సింబల్ గా ఎంచుకోవచ్చని తెలుస్తోంది. దీంతో రజనీ ముద్ర వెనుక ఇన్ని సీక్రెట్స్ ఉన్నాయా అని అందరూ ఆశ్చర్యపోతున్నారు.