మృగశిర కార్తెలో కూడా ముఖం చాటేసిన వరుణులు ఇప్పుడు తెలుగు రాష్ట్రాలపై కరుణ చూపుతున్నాడు.  గత కొన్ని రోజులుగా భానుడి భగభగలకు, ఉక్కపోత కు తల్లడిల్లిపోతున్న తెలుగు రాష్ట్రాలకు   భారత వాతావరణ శాఖ  తాజాగా  చల్లని కబురు అందించింది. నైరుతి రుతుపవనాలు చురుకుగా కదులుతున్నాయనీ,  వీటి ప్రభావంతో ఈ నెల 20 వరకూ తెలుగు రాష్ట్రాల్లో  ఈ నెల 30వ వరకూ విస్తారంగా వర్షాలు కురుస్తాయని  పేర్కొంది.  

ఈ వర్షాల రాకతో ఎండల తీవ్రత ఒక్కసారిగా తగ్గి, రాబోయే రోజుల్లో  ఉష్ణోగ్రతలు 5 డిగ్రీల సెల్సియస్ వరకు పడిపోయే అవకాశం ఉందని తెలిపింది.అమరావతి, హైదరాబాద్ వాతావరణ కేంద్రాల సమాచారం మేరకు.. రానున్న వారం రోజులూ.. తెలుగు రాష్ట్రాలలోని దాదాపు అన్ని ప్రాంతాలలో తేలికపాటి నుంచి భారీ వర్షాలు కురుస్తాయి.    కొన్ని జిల్లాల్లో   ఉరుములు, మెరుపులతో కూడిన అతి భారీ వర్షాలు పడే అవకాశం ఉంది.  

ఆంధ్రప్రదేశ్ లో   బుధవారం (జూన్ 24)  శ్రీకాకుళం, విజయనగరం, విశాఖపట్నం, ఉభయ గోదావరి జిల్లాలలో పలు చోట్ల  భారీ వర్షాలు కురిసే అవకాశం ఉంది.  ఇక ఈ నెల  జూన్ 29, 30 తేదీలలో ఈ జిల్లాల్లో వర్షాల తీవ్రత మరింత తీవ్రంగా ఉంటుంది. అలాగే..  కృష్ణా, గుంటూరు, ప్రకాశం, నెల్లూరు  జిల్లాలలో ప్రారంభంలో మోస్తరు వర్షాలు కురుస్తాయి.  రాయలసీమ ప్రాంతంలో  ఈ వారం చివరిలో భారీ వర్షాలు కురిసే అవకాశం ఉంది.   

అలాగే  తెలంగాణలో కూడా బుధవారం (జూన్ 24)  ఆదిలాబాద్, నిజామాబాద్, కరీంనగర్, ఖమ్మం, నల్గొండ  జిల్లాల్లో భారీ వర్షాలు కురుస్తాయి. ఈ జిల్లాలకు వాతావరణ శాఖ ఎల్లో అలర్ట్  జారీ చేసింది.  వారం చివరి నాటికి ఈ వర్షాలు రాజధాని హైదరాబాద్, రంగారెడ్డితో పాటు రాష్ట్రంలోని దక్షిణ జిల్లాలకు  పూర్తిగా విస్తరిస్తాయి.