జార్ఖండ్ లో పార్టీని పటిష్టం చేసేందుకు రాహుల్ గాంధీ పర్యటిస్తున్నారు. రాహుల్ పర్యటనని అడ్డుకుని తీరాలన్న కసితో ఉన్న బీజేపీ నేతలు, కార్యకర్తలు ఒక్కసారిగా యూపీఏ రాజకుమారుడి కాళ్లకు అడ్డంపడ్డారు. వెనక్కి తిరిగి వెళ్లిపొమ్మంటూ పెద్ద పెట్టున నినాదాలు చేశారు. భవిష్యత్ ప్రథానమంత్రిగా తాము ఊహించుకుంటున్న రాహుల్ కి ఇంతచేటు అవమానం జరిగేసరికి కాంగ్రెస్ కార్యకర్తలు, లోకల్ నేతలకు ఎక్కడ కాలాలో అక్కడే కాలింది. కాకపోతే కాక మరీ ఎక్కువయ్యిందేమో, వరసపెట్టి దొరికినవాళ్లని దొరికినట్టుగా బిజెపి నేతల్ని, కార్యకర్తల్నీ ఉతికి పారేశారు. మళ్లీ ఆ ఛాయల్లోకి రావాలంటే భయం పుట్టేరీతిలో చావగొట్టి వదిలిపెట్టారు. ఈ దెబ్బతో నేను అధిష్ఠానం దృష్టిలో పడి సామాన్య కార్యకర్త స్థాయినుంచి జాతీయ స్థాయికి ఎదిగిపోవాలన్నంత కసి కాంగ్రెస్ కార్యకర్తల్లో కనిపించింది. క్షణాల్లో రాహుల్ కి దారి క్లియరైపోయింది.