అసోం అల్లర్లలో విద్యేషాల్ని రెచ్చగొట్టడానికి ఫేస్ బుక్ ని కొందరు అడ్డంగా వాడుకున్నారన్న విషయం బైటపడిపోయింది. ఉద్దేశపూర్వకంగానే రెచ్చగొట్టే వ్యాఖ్యలు, చిత్రాల్ని ఈ మాధ్యమం ద్వారా చాలామందికి సర్క్యులేట్ చేసి నష్టాన్ని భారీగా పెంచారన్న విషయం ప్రాథమిక విచారణలో తేలింది. దీన్ని సాకుగా చూపిస్తూ మొత్తం ప్రసారమాధ్యమాలపై ఉక్కుపాదం మోపే ప్రతిపాదనకు ప్రభుత్వం పదునుపెడుతోంది. ఎలక్ట్రానిక్ మీడియా, పత్రికలు చెప్పుకుంటున్న స్వీయనియంత్రణ ఒట్టిమాటేనని చెబుతూ ప్రెస్ కౌన్సిల్ ఆఫ్ ఇండియా ప్రభుత్వానికి ఓ నివేదికను అందజేసింది. ఎలక్ట్రానిక్ మీడియా, ప్రింట్ మీడియాలతోపాటు ఇంటర్ నెట్ మాధ్యమాల్నికూడా చెప్పుచేతల్లో పెట్టుకునే ఏర్పాట్లను వేగవంతం చేయాలని సూచించింది. 1978 ప్రెస్ కౌన్సిల్ చట్టానికి సవరణలు చేసి వెంటనే మీడియాపై అదుపును సాధించాలని ప్రెస్ కౌన్సిల్ ఆఫ్ ఇండియా ప్రభుత్వానికి సూచించింది.

పాత్రికేయుల నియామకాల విషయంలో ప్రింట్ మీడియాలో ఉన్న భద్రత ఎలక్ట్రానిక్ మీడియాలో లేకపోవడం విచారకరమని ప్రెస్ కౌన్సిల్ ఆఫ్ ఇండియా భావిస్తోంది. ఎలక్ట్రానిక్ మీడియాలోకూడా ప్రింట్ మీడియా అనుసరిస్తున్న విధానాల్ని పాటించాల్సిన అవసరం ఎంతైనా ఉందని పిసిఐ గట్టిగా వాదిస్తోంది. పిసీసీ పేరును మీడియా కౌన్సిల్ మార్చాలనికూడా తీర్మానం జరిగింది.