రాష్ట్ర ముఖ్యమంత్రి కిరణ్ కుమార్ రెడ్డి తన మాటలకు పదనుపెట్టి ఘాటైన పదజాలంతో ఒకవైపు జగన్ నూ, మరోవైపు టి.ఆర్.ఎస్. నూ ఉక్కిరిబిక్కిరి చేస్తున్నారు. ప్రత్యేకించి జగన్ తో టి.ఆర్.ఎస్.కు ఉన్న సంబంధాలను ప్రస్తావించకుండా ఆయన ప్రసగ్నాన్ని ముగించటం లేదు. ఇంతవరకూ ప్రత్యేక తెలంగాణాకు తాను వ్యతిరేకం కాదన్న సిఎం ఉప ఎన్నికల సందర్భంగా (ఎన్నికలు జరిగే 18 స్థాన్నాల్లో 17 అసంబ్లీ స్థానాలు సీమాంధ్రలోనివే) రాష్ట్ర విభజనపై కర్ర విరగాకూడదు ... పామూ చావకూడదు అన్న విధంగా వ్యవహరిస్తున్నారు.

ఇటీవల జరిగిన ఉదంతాలను ఉదాహరిస్తూ సిఎం తాను చేసే ప్రసంగం ఆసక్తికరంగా సాగేందుకూ జాగ్రత్తలు తీసుకుంటున్నారు. వై.ఎస్.లానే ఈయన కూడా చేతులు ఊపుతూ ఆవేశపూరితమైన పదాలను ఉచ్చరిస్తున్నారు. ఓ సందర్భంలో వై.ఎస్.తాను తెలంగాణాకు అడ్డమూ. నిలువూ కాదని సంచలనమైన వ్యాఖ్య చేశారు. అదే విధంగా సిఎం మాటల్లో ... "తన తండ్రి వ్యతిరేకించిన తెలుగుదేశం, మతతత్వపార్టీగా ముద్ర వేయించుకున్న బిజెపిలతో జతకట్టిన జగన్ ఏమి చేసేందుకైనా వెనుకాడదు. ఆ రెండు పార్టీలే వై.ఎస్.కు సిద్ధాంతపరంగా బద్ధశత్రువులన్న విషయాన్ని జగన్ మరిచాడు. అందుకే నన్ను దించాలని ఆ రెండు పార్టీలను సహాయం అర్థించాడు. ఇంకా రాష్ట్రాన్ని రెండు ముక్కలు చేసేందుకు చూస్తున్న టి.ఆర్.ఎస్.తో జతకట్టాడు. అందుకే గత ఎన్నికల్లో తెలంగాణా లో పోటీకి ఎవరినీ నిలబెట్టలేదు. అసలు ఈ సంబంధం సక్రమమేనా అని నేను ప్రశ్నిస్తున్నాను.

జగన్ కు ఏమైనా నీతి ఉందా అని ప్రశ్నిస్తున్నాను. టి.ఆర్.ఎస్.కు మద్దతు ఇచ్చిన జగన్ సమైక్యవాడా అని నేను అడుగుతున్నాను. మీరే చెప్పండి! అవినీతికి కేరాఫ్ అడ్రస్సుగా మారిన జాగర్ రాష్ట్రాన్ని పాలిస్తారా? లేక ఇంకా దోచేస్తారా? ఏమైనా తన అధికారం కోసం ఎన్నికల నిబంధనలన్నీ పాతరేస్తాడు. రోడ్డుషోలో మందు బాటిల్స్ పంచుతూ పోయిన జగన్ నీతి గురించి ఇంకోసారి చెప్పే పనే లేదు. ఇక పచ్చి అవకాశవాదం ఉన్న టి.ఆర్.ఎస్. గురించి చెప్పాల్సిన పనిలేదు'' ఇలా ఘాటెక్కిన పదాలతో పాటు సిఎం ముఖం కూడా సీరియస్ గా ఉండటంతో ఈ ప్రసంగం వింటున్న వారు అలానే నిలిచిపోతున్నారు. గతంలో చూసిన సిఎం కిరణ్ ఇతనేనా? అనిపించేలా ఈ ప్రసంగాలున్నాయని పరిశీలకులు వ్యాఖ్యానిస్తున్నారు. అంతేకాకుండా సిఎం ప్రసంగాల ఘాటుకు సమాధానం చెప్పేందుకు పార్టీలు కూడా తడబడుతున్నాయి. వరుస ఉదాహరణలతో ఆయన ప్రసంగం ఓ ధారలా సాగిపోతోందని పలువురు కాంగ్రెస్ నేతలూ ప్రశంసిస్తున్నారు.