పశ్చిమగోదావరి జిల్లా పోలవరం అసెంబ్లీ నియోజాగావర్గంలో త్రిముఖపోటీ నెలకొంది. ప్రధానపోటీ మాత్రం వై.ఎస్.ఆర్.కాంగ్రెస్, తెలుగుదేశంపార్టీల మధ్య ఉండవచ్చని పరిశీలకులు భావిస్తున్నారు. వై.ఎస్.ఆర్. కాంగ్రెస్ పార్టీ తరపున తెల్లం రామరాజు, తెలుగుదేశం పార్టీ తరుపున మొడియం శ్రీనివాసు, కాంగ్రెస్ తరుపున నూపా పార్వతి పోటీలో ఉన్నారు. ఈ నియోజకవర్గంలో లక్షా 72వేల 187మంది ఓటర్లున్నారు. కొత్తగా ఏడు వేల పైచిలుకు ఓట్లు పెరిగాయి. ఈసారి రంగంలో ఉన్న ముగ్గురిలోనూ రామరాజు సీనియర్. తనకున్న అనుభవంతో ఓట్లను మలుచుకోగలరని పరిశీలకులు అంచనా వేశారు. ఈయన తరువాత తెలుగుదేశం అధినేత చంద్రబాబు పర్యటనల వల్ల నియోజకవర్గంలో ఆ పార్టీకి మద్దతు పెరిగింది. దీంతో అభ్యర్థి మొడియం శ్రీనివాస్ కు రామరాజుతో పోటీపడే అవకాశాలున్నాయి. శ్రీనివాస్ తమ పార్టీ అధినేత పర్యటనలతో పాటు సీనియర్ కార్యకర్తలను సమీకరించుకుని ప్రచారాలు చేస్తున్నారు. ఇది కూడా సత్ఫలితాలు ఇవ్వవచ్చని దేశం ధీమాగా ఉంది. అయితే రాజకీయాలకే కొత్త అయిన నూపా పార్వతికి కాంగ్రెస్ అవకాశమిచ్చింది. అసలు ఎన్నికల్లో పోటీ చేసిన అనుభవం లేని ఆమె కాంగ్రెస్ నేతల ప్రచారంపైనా, సీనియర్ కార్యకర్తల సలహాలపైన ఆధారపడ్డారు. దీంతో ఆమెకు విజయావకాశాలు తక్కువని నియోజకవర్గంలో ప్రచారం జరుగుతోంది. పేరుకే నియోజకవర్గంలో మూడు ప్రధానపార్టీలు ఉన్నా పోటీ మాత్రం తెలుగుదేశంపార్టీ, వై.ఎస్.ఆర్. కాంగ్రెస్ పార్టీ మధ్యనే ఉంటుందని అంచనా.