దేవునితో మాట్లాడా... ప్రమాణం చేశా..

గతంలో అమెరికా అధ్యక్షుడైన బరాక్ ఒబామాపై సంచలన వ్యాఖ్యలు చేసి ఒక్కసారిగా వార్తల్లోకి ఎక్కిన ఫిలిప్పీన్స్ అధ్యక్షుడు రోడ్రిగో డ్యుటెర్టె అప్పటి నుండి అప్పుడప్పుడు వార్తల్లోకి ఎక్కుతున్న సంగతి తెలిసిందే. ఈసారి మరోసారి తన వ్యాఖ్యలతో వార్తల్లోకి ఎక్కారు. అది కూడా దేవుడితో మాట్లాడానని చెప్పి అందరికి షాకిచ్చారు. జపాన్ నుంచి తిరిగి స్వదేశానికి వస్తూండగా.. విమానంలో అందరూ నిద్రిస్తున్న సమయంలో తాను మాత్రం ఆకాశం వైపు చూశానని.. ఆ సమయంలో తానొక గొంతును విన్నానని.. భవిష్యత్తులో నిరర్ధక వ్యాఖ్యలు మానుకోపోతే విమానాన్ని ఇప్పుడే కూల్చేస్తాననే మాటలు ఆకాశవాణి రూపంలో తనకు వినిపించినట్లు చెప్పారు. మీరెవరు? అని ప్రశ్నించగా దేవుడనే సమాధానం వచ్చిందని తెలిపారు. ఇక నుంచి తాను ఎవరినీ దూషిస్తూ మాట్లాడనని, శపించనని దేవుడికి ప్రమాణం చేస్తున్నానని చెప్పారు. దేవుడికి ప్రమాణం చేస్తే ఫిలిప్పీన్ ప్రజలందరికీ ప్రమాణం చేసినట్లేనని అన్నారు.