ఏపీలో ఎప్పుడు ఏం జరుగుతుందో.. వైసీపీ చూపు ఎవరిపై పడుతుందో.. ఎవరిని ఎందుకు అరెస్టు చేస్తుందో తెలియని పరిస్థితి నెలకొని ఉంది. ఇప్పటికే రాష్ట్రంలో తెలుగుదేశం కార్యకర్తలు, నాయకులను ఎక్కడ, ఎప్పుడు, ఎందుకు అరెస్టు చేస్తున్నారో తెలియని పరిస్థితి ఉంది. ఇప్పుడు జనసేన నాయకులు, కార్యకర్తల విషయంలో కూడా అదే పరిస్థితి తలెత్తిందా అన్న అనుమానాలు వ్యక్తమౌతున్నాయి. ప్రధాని నరేంద్రమోడీ విశాఖపట్నం పర్యటనలో ఉన్నారు.

జనసేనాని పవన్ కల్యాణ్ ఆయనతో బేటీ అయ్యారు. సరిగ్గా పవన్ మోడీ విశాఖలో భేటీ అయిన సమయంలోనే నగరిలో జనసేన ఇన్ చార్జ్ ను పోలీసులు అరెస్టు చేశారు. ఈ అరెస్టును నిరసిస్తూ జనసేన ఇన్ చార్జి కిరణ్ రాయల్ కుటుంబ సభ్యులు నగరి పోలీసు స్టేషన్ వద్ద నిరసనకు దిగారు. కిరణ్ కు నగరి ప్రభుత్వాసుపత్రిలో వైద్య పరీక్షల అనంతరం కోర్టుకు తీసుకువెళ్లారు.

కోర్టు వద్ద ఆయనకు మీడియాతో మాట్లాడే అవకాశం కూడా ఇవ్వలేదు. ఇటీవలి కాలంలో జనసేనాని వైసీపీ సర్కార్,జగన్ పై విమర్శల తీవ్రత పెంచిన నేపథ్యంలోనే ఈ అరెస్టు జరిగిందని భావిస్తున్నారు. కాగా కిరణ్ అరెస్టును జనసేనాని, ఆ పార్టీ నాయకుడు నాదెండ్ల మనోహర్ ఖండించారు. కాగా ఈ అరెస్టుకు నిరసనగా పెద్ద సంఖ్యలో జనసేన నాయకులు కార్యకర్తలు పెద్ద సంఖ్యలో నగరికి చేరుకున్నారు. ఉద్రిక్త పరిస్థితులు నెలకొన్న నేపథ్యంలో మంత్రి రోజా నివాసం వద్ద పోలీసులు భారీ బందోబస్తు చేశారు.