ఒక్కోసారి కొన్ని సందర్భాలను, సన్నివేశాలను చూస్తుంటే నవ్వాలో ఏడవాలో అర్థంకాదు. ఈరోజు అభిమానులు ‘పవర్ స్టార్’ అని పిలుచుకునే పవన్ కళ్యాణ్ పుట్టినరోజు. ఈ సందర్భాన్ని పురస్కరించుకుని ఆంధ్రప్రదేశ్, తెలంగాణ వ్యాప్తంగా పవన్ కళ్యాణ్ అభిమానులు ఉత్సాహంగా సంబరాలు చేసుకుంటున్నారు. ఒక అభిమాని అయితే పవన్ కళ్యాణ్ పుట్టినరోజు ఏర్పాట్లు చేస్తూ వుండగా కరెంట్ షాక్‌తో చనిపోయాడు. ఎవరి పుట్టినరోజో జరపడానికి ఎవరో ప్రాణాలు కోల్పోయారు. అభిమానించే వ్యక్తికి, అభిమానాన్ని పొందుతున్న వ్యక్తికి మధ్య ఎలాంటి సంబంధం లేదు. అయినప్పటికీ అభిమానిస్తారు. సరే, ఇదిలా వుంటే, ఇక్కడ పవన్ కళ్యాణ్ ఫ్యాన్స్ ఉత్సాహంగా ఆయన పుట్టినరోజు వేడుకలు జరుపుకుంటూ వుంటే, అక్కడ పవన్ కళ్యాణ్ మాత్రం ఈ ఉత్సాహంలో తాను పాలు పంచుకోలేక బెంగుళూరు ఆస్పత్రిలో వెన్నునొప్పి చికిత్స చేయించుకుంటున్నాడు. ఇక్కడ ఫ్యాన్స్ మాత్రం తమ హీరో వెన్నునొప్పి విషయం గురించి ఎంతమాత్రం ఆలోచించకుండా ఉత్సాహంతో చిందులు వేస్తున్నారు. ఆయన వెన్నునొప్పి వీళ్ళకి పట్టదు.. వీళ్ళ ఉత్సాహం ఆయనకి పట్టదు. మరి ఇలాంటి సందర్భాలను చూస్తుంటే నవ్వాలో ఏడ్వాలో అర్థం కాని స్థితి కలగడం న్యాయమే కదా?!