పాకిస్థాన్‌లో ఆత్మాహుతి దాడి జరిగింది. పాకిస్థాన్ వాయవ్య ప్రాంతంలోని ఒక ప్రభుత్వ కార్యాలయంలోకి మోటర్ సైకిల్ మీద వచ్చిన దుండగుడు తనను తాను పేల్చేసుకోవడంతో భారీ విధ్వంసం జరిగింది. ఈ ఘటనలో 22 మంది మరణించారు. వాయవ్య పాకిస్థాన్‌లోని మార్దన్ ప్రాంతంలో నేషనల్ డేటాబేస్ అండ్ రిజిస్ట్రేషన్ అథారిటీ కార్యాలయం గేటును తోసుకుంటూ రద్దీగా వుండే కార్యాలయంలోకి మోటర్ సైకిల్‌తో దూసుకెళ్ళి ఆత్మాహుతి చేసుకోవడంతో 22 మరణించడంతోపాటు 25 మందికి తీవ్ర గాయాలయ్యాయి. కార్యాలయం గేటు దగ్గర వున్న సిబ్బంది దూసుకొస్తున్న మోటార్ సైకిల్‌ని ఆపడానికి ప్రయత్నించినా విఫలమయ్యారు. పేలుడు ధాటికి కార్యాలయ భవనం తలుపులు, కిటికీలు ధ్వంసమైపోయాయి. క్షతగాత్రుల్లో చాలామంది పరిస్థితి విషమంగా వున్నట్టు సమాచారం.