తెలంగాణ రాష్ట్ర ప్రభుత్వం నిర్వహిస్తున్న సమగ్ర కుటుంబ సర్వేకి కేసీఆర్ తనయుడు, తెలంగాణ రాష్ట్ర మంత్రి కేటీఆర్ ప్రాతినిధ్యం వహిస్తున్న సిరిసిల్ల నియోజకవర్గంలోనే అభ్యంతరాలు వ్యక్తమయ్యాయి. సిరిసిల్లలోని సంజీవయ్య నగర్ కాలనీకి సర్వే చేయడం కోసం అధికారులు వెళ్ళారు. అక్కడ కాలనీ ప్రజలు అధికారులను అడ్డుకున్నారు. సర్వే కోసం ఇచ్చిన ప్రశ్నలు అసమగ్రంగా వున్నాయని వారు ఈ సందర్భంగా అభ్యంతరం వ్యక్తం చేశారు. సర్వే ప్రశ్నావళిలో ఆస్తులకు సంబంధించిన ప్రశ్నలు వున్నాయిగానీ, అప్పులకు సంబంధించిన ప్రశ్నలు లేవేమిటని, ఆస్తుల గురించి అడుగుతారు తప్ప అప్పుల గురించి అడగరా అని వారు ఈ సందర్భంగా అధికారులను ప్రశ్నించారు. ఆ ప్రశ్నకు తమ దగ్గర సమాధానం లేకపోవడంతో అధికారులు నీళ్ళు నమిలారు.