ఏటీఎంకి తాళం వేయలేదు.. 26 లక్షలు...
posted on Sep 20, 2014 11:08AM
హైదరాబాద్లోని సంజీవరెడ్డి నగర్లో లతీఫ్ అనే విద్యార్థి ఏటీఎంలోనుంచి రెండు వందలు తీసుకుందామని స్టేట్ బ్యాంక్ ఆఫ్ హైదరాబాద్ ఏటీఎంకి వెళ్ళాడు. ఏటీఎంలో అలా కార్డు పెట్టాడో లేదో ఇలా ఏటీఎం బీరువా తెరుచుకున్నట్టు తెరుచుకుంది. ఆ ఏటీఎంలో వున్న 26 లక్షల రూపాయలు కూడా బయటపడ్డాయి. అంత డబ్బు చూసి లతీఫ్ బిత్తరపోయాడు. ఇంకా ముదరని చిన్నపిల్లాడు కావడంతో అతి తెలివితేటలేవీ ప్రదర్శించకుండా టోల్ ఫ్రీ నంబర్ ద్వారా పోలీసులకు సమాచారం అందించాడు. అధికారులు వచ్చే వరకూ ఏటీఎంకి కాపలా వున్నాడు. పోలీసులు, బ్యాంక్ అధికారులు హడావిడిగా వచ్చి, ఏటీఎంలో డబ్బు పెట్టిన సిబ్బంది తాళం వేయలేదని తెలుసుకున్నారు. లతీఫ్కి థాంక్స్ చెప్పారు. ఇంకో ట్విస్ట్ ఏమిటంటే, ఆ ఏటీఎంలోగానీ, పరిసరాల్లోగానీ సీసీ కెమెరాలు లేవు. లతీఫ్ బదులు ఆ సమయంలో ఎవరైనా ముదుర్లు వెళ్ళినట్టయితే పావలా కూడా తిరిగి దొరికేది కాదు.