నేపాల్‌లో శుక్రవారం తెల్లవారుఝామున ఘోర ప్రమాదం జరిగింది. నారాయణ్‌ ఘాట్ - ముగ్‌లింగ్ జాతీయ రహదారి మీద కొండ చరియలు విరిగిపడ్డాయి. ఇవి రోడ్డు మీద దాదాపు 65 మందికి పైగా ప్రయాణికులతో వెళ్తున్న రెండు బస్సులపై పడ్డాయి. దాంతో ఆ రెండు బస్సులు పక్కనే ఉన్న త్రిశూన్ నదిలో పడ్డాయి. బస్సులలో వున్నవాళ్ళలో ముగ్గురు తప్ప అందరూ గల్లంతు అయ్యారు. గల్లంతైన వారిలో ఏడుగురు భారతీయులు కూడా ఉన్నట్లు సమాచారం. అలాగే మరో బస్సుపై కొండచరియలు విరిగిపడటంతో డ్రైవర్ మృతి చెందాడు. నదిలో పడిపోయిన రెండు బస్సులలో ఒక బస్సు 24 మంది ప్రయాణికులతో కాఠ్మాండూ వెళుతోంది. మరో బస్సులో 41 మంది వున్నారు. ఒక బస్సు నుంచి ముగ్గురు ప్రయాణికులు బయటకి దూకి తప్పించుకున్నారు. ఈ ఘటనపై నేపాల్ ప్రధానమంత్రి పుష్పకమల్ దహల్ విచారం వ్యక్తంచేశారు. నేపాల్ సాయుధ దళాలు ఘటనా స్థలానికి చేరుకొని సహాయక చర్యలు ప్రారంభించాయి.