నెల్లూరుజిల్లా: నెల్లూరుజిల్లా కోవూరు అసెంబ్లీ సెగ్మెంట్ ఉపఎన్నికలు ఆసక్తికరంగా మారాయి. పోటీ ప్రధానంగా కాంగ్రెస్, వైఎస్సార్ కాంగ్రెస్, టిడిపి మధ్యనే ఉంటుంది. అయితే ఈ ముగ్గురు అభ్యర్దుల్లో విజేత ఎవరో నిర్ణయించేది మాత్రం ఈ నియోజకవర్గంలోని సుమారు 10వేల మంది సిపిఎం సానుభూతిగల ఓటర్లే. ఈ ఎన్నికల్లో సిపిఎం తన అభ్యర్ధిని నిలబెట్టింది. సిపిఐ కూడా తన మద్దతును సిపిఎం అభ్యర్ధికే ప్రకటించింది. కోవూరు నియోజకవర్గంలో సిపిఎంకు సుమారు 10వేల మంది ఓటర్ల మద్దతు ఉంటుంది. సిపిఎం అభ్యర్ధి గెలిచే అవకాశాలు లేకపోయినా మిగిలిన ముగ్గురు అభ్యర్ధుల గెలుపు ఓటములను నిర్ణయించే శక్తి మాత్రం ఉంది. సిపిఎం ప్రధానంగా కాంగ్రెస్ పార్టీ ఓటర్లనే చీల్చుకుంటుందని, కాంగ్రెస్ పార్టీ ఇప్పటికే రెండుగా చీలిపోయిందని, అందువల్ల ఈ ఎన్నికల ఫలితాలు తమకు సానుకూలంగా ఉంటాయని టిడిపి భావిస్తోంది. వైఎస్సార్ కాంగ్రెస్ వల్ల కాంగ్రెస్ కు ఇక్కడ గట్టిదెబ్బే తగిలింది. అయితే వైఎస్సార్ కాంగ్రెస్ పార్టీకి గ్రూపు రాజకీయాలతో సతమతమవుతుంది. ఇక్కడ పోటీ చేస్తున్న ఆ పార్టీ అభ్యర్ధి ప్రసన్నకుమార్ రెడ్డి ప్రధానం గా వైఎస్ బొమ్మా, జగన్ పర్యటనలపైనే ఆశపెట్టుకుని ఉన్నారు. ఈనెల మూడు నుంచి జగన్ ఈ నియోజకవర్గంలో ప్రచారం చేస్తున్నారు. కోవూరు ఉప ఎన్నికల్లో బిజెపి పోటీ చేయడంలేదు. ఆ పార్టీ మద్దతు ఎవరికనేది మిస్టరీగా మారింది. పోటీలో ఉన్నా లేకపోయినా భావసారూప్యంగల పార్టీలు రంగంలోలేవని, అందువల్ల కాంగ్రెస్, తెలుగుదేశం పార్టీ, వైఎస్సార్ కాంగ్రెస్ పార్టీలకు సమాన దూరంగా ఉంటామని బిజెపి నేతలు స్పష్టం చేస్తున్నారు.