అప్పుడే పుట్టిన ఓ కుక్కపిల్లకు తానే తల్లి అనుకుంటోంది ఓ వానరం. శునకం పిల్లపై ఆ వానరం కనబరుస్తున్న ప్రేమ అందరినీ ఆశ్చర్య చకితులను చేస్తోంది. అదే సమయంలో తన పిల్ల కోసం ఆ కుక్క పిల్ల తల్లి తల్లడిల్లుతున్న తీరు అయ్యో పాపం అనీ అనిపిస్తోంది. ఇంతకూ విషయమేంటంటే  జయశంకర్ భూపాలపల్లి జిల్లా రేగొండ మండలం తిరుమలగిరి గ్రామంలో  అప్పుడే పుట్టిన కుక్కపిల్లను తన పిల్ల అనుకొని ఒక వానరం ఎత్తుకెళ్ళింది. ఆ కుక్కపిల్లను హత్తుకుని ముద్దులు పెడుతూ గ్రామం అంతా తిరుగుతోంది.  

కుక్కపిల్ల కోసం తల్లికుక్క తల్లడిల్లిపోతోంది. కోతి చెట్లు, ఇళ్ల కప్పులపై కుక్కపిల్లను హత్తుకుని తిరుగుతుంటే.. తల్లి కుక్క ఆ వానరం వెంటే కింద నేలపై అరుస్తూ పరుగులు పెడుతోంది.   స్థానికులు ఎంత ప్రయత్నం చేసినా   కుక్క పిల్లను మాత్రం ఆ కోతి వదలడంలేదు. మామూలుగా పిల్లి, కుక్క స్నేహం, మేకపిల్లకు పాలిస్తున్న కుక్క లాంటి వాటిని చూసి ఉంటాం. అయితే ఇలా తన జాతి కాని జంతువు పిల్లను తన పిల్లేనన్న భ్రమలో వానరం ఆ కుక్కపిల్లపై చూపుతున్న అనురాగం, ఆప్యాయతా మాత్రం విస్తుగొలుపుతున్నాయి. అదే సమయంలో పిల్లను దూరం చేసుకున్న ఆ తల్లి కుక్క అల్లాడుతున్న తీరు కంటనీరు తెప్పిస్తోందని అంటున్నారు స్థానికులు.