శారీరిక వైకల్యం ఉన్నవారిని వికలాంగులు అని పిలవడం అవమానమన్నది మన ప్రధానమంత్రి మోదీ అభిప్రాయం. అందుకే ఆయన ఆలోచించి ఆలోచించి వారికి ‘దివ్యాంగ్‌’ అన్న పేరుని సూచించారు. వికలాంగులను ఇక నుంచి దివ్యాంగులని పిలవాలంటూ పలు సందర్భాలలో చెప్పారు కూడా. ఆయన సూచన మేరకు మోదీ సహచరులు కూడా దివ్యాంగ్‌ అన్న పేరుని అధికారికంగా వాడటం మొదలుపెట్టారు. నిన్న ప్రవేశపెట్టిన రైల్వే బడ్జెట్‌లో కూడా వికలాంగులకు అందించే సదుపాయాల గురించి చర్చిస్తూ వారిని దివ్యాంగులుగానే పేర్కొన్నారు. రైల్వే బడ్జట్‌తో ఈ మాట దేశం మొత్తానికీ పరిచయం అయిపోయింది. అయితే తమని ఇలా పిలవడాన్ని వికలాంగులు వ్యతిరేకిస్తున్నట్లు సమాచారం. దివ్యాంగ్ అంటే అధ్బుతమైన శరీరభాగం అన్న అర్థం వస్తోందనీ, లేని శరీర భాగాన్ని అద్భుతం అనుకోవడం తమని అవమానించినట్లే అనీ విమర్శలు వినిపిస్తున్నాయి. ‘దివ్యంగ్‌ అని పిలుచుకోవడానికి అదేమీ దేవుడిచ్చిన వరం కాదని’ అని తమిళనాడుకి చెందిన ఝాన్సీ రాణి అనే సామాజిక కార్యకర్త మండిపడుతున్నారు.