లోకేష్ ప్రోత్సాహంతోనే మంత్రులపై దాడి
Published on: Thu Jun 18, 2020 4:28PM
ఏపీ శాసనమండలిలో అధికార విపక్షాల మధ్య యుద్ధం మాటలు దాటి ఒకరిపై ఒకరు చెయ్యి చేసుకునే స్థాయికి చేరిన సంగతి తెలిసిందే. మండలిలో ఉద్రిక్తతలకు మీరు కారణమంటే, మీరు కారణమంటూ అధికార విపక్ష నేతలు ఒకరిపై ఒకరు విమర్శలు చేసుకుంటున్నారు. తాజాగా, ఈ అంశంపై స్పందించిన మంత్రి వెల్లంపల్లి శ్రీనివాసరావు.. మండలిలో ఘర్షణకు టీడీపీ నేత నారా లోకేష్ కారణమని ఆరోపించారు. లోకేష్ నిబంధనలకు విరుద్ధంగా సభలో ఫొటోలు తీశాడని, ఎవరు చెప్పినా వినిపించుకోలేదని మంత్రి తెలిపారు. మండలి చైర్మన్ కూడా చెప్పారని, అయినప్పటికీ లోకేష్ ఫొటోలు తీశారని ఆరోపించారు. దాంతో తాను జోక్యం చేసుకుని ఫొటోలు తీయొద్దంటూ లోకేష్ కి చెప్పానని అన్నారు. అయితే, టీడీపీ ఎమ్మెల్సీలు బీద రవిచంద్ర, దీపక్ రెడ్డి తనపై దాడి చేశారని, అందుకు లోకేష్ ప్రోత్సాహం ఉందని మంత్రి వెల్లంపల్లి ఆరోపించారు. ఇతర మంత్రులు గౌతమ్ రెడ్డి, కన్నబాబులపై కూడా దాడి జరిగిందని పేర్కొన్నారు. లోకేష్ తీరు చూస్తుంటే సిగ్గేస్తోందని, తాము ప్రజల కోసమే పనిచేస్తున్నామని, అందుకే ఇలాంటి దాడులను భరిస్తున్నామని మంత్రి వెల్లంపల్లి వ్యాఖ్యానించారు.


