మాసాయిపేట ఘటనలో తీవ్రంగా గాయపడి యశోదా ఆస్పత్రిలో చికిత్స పొందుతున్న వారిలో ఇద్దరూ చిన్నారులు మృతి చెందారు. సోమవారం సాయంత్రం చిన్నారి తరుణ్ మృతి చెందగా, ఈ రోజు ఉదయం 11 ఏళ్ల వైష్ణవి తుది శ్వాస విడిచినట్లు వైద్యులు ప్రకటించారు. తరుణ్ తలకు తీవ్ర గాయాలై, తీవ్ర రక్తస్రావం కావడంతో చిన్నారి శరీరం వైద్యానికి సహకరించలేదు. అలాగే చిన్నారి వైష్ణవి పరిస్థితి విషమంగా ఉందని నిన్ననే వైద్యులు చెప్పారు. ఉదయమే ఆ బాలిక చనిపోవటంతో అక్కడ విషాదపరిస్థితి నెలకొంది. చిన్నారుల మృతితో యశోద ఆసుపత్రి ప్రాంగణం కుటుంబీకుల రోదనలతో శోకసంద్రంగా మారింది. చిన్నారి తల్లిదండ్రులను ఆక్రందనలు అందర్నీ కదిలించాయి. పోస్టుమార్టం నిమిత్తం మృతదేహాలను గాంధీ ఆసుపత్రికి తరలించారు. మాసాయిపేట రైలు ప్రమాద మృతుల సంఖ్య 18కు చేరింది.