ప్రధాని నరేంద్ర మోదీకి చెందిన అధికారిక ఫేస్‌బుక్ వీడియోను తాత్కాలికంగా తొలగించడంపై పార్లమెంటరీ సమాచార సాంకేతిక  స్టాండింగ్ కమిటీ తీవ్ర ఆగ్రహం వ్యక్తం చేసింది. ఈ  వ్యవహారంలో సాంకేతిక లోపం సాకును కమిటీ   తిరస్కరిస్తూ, మెటా అధినేత మార్క్ జుకర్‌బర్గ్ స్వయంగా ప్రధానికి క్షమాపణ చెప్పాలని డిమాండ్ చేసింది. పార్లమెంటరీ కమిటీ ఛైర్మన్ నిషికాంత్ దూబే నేతృత్వంలో జరిగిన  స్టాండింగ్ కమిటీ సమావేశం  మెటా ప్రతినిధులకు   హెచ్చరికలు జారీ చేయడం నెట్టింట హాట్ టాపిక్ గా మారింది. 

సోషల్ మీడియా దిగ్గజం మెటా యాజమాన్యంలో నడుస్తున్న ఫేస్‌బుక్ ప్లాట్‌ఫామ్‌లో ప్రధాని నరేంద్ర మోదీ పోస్ట్ చేసిన ఒక   వీడియో దాదాపు ఐదు గంటల పాటు అందుబాటులో లేకుండా పోయింది.  ఈ ఘటనపై విచారణ చేపట్టిన పార్లమెంటరీ కమిటీ, బాధ్యులపై కఠిన చర్యలు తీసుకోవాలని స్పష్టం చేసింది. ఇందుకు  సంబంధించిన పూర్తి కారణాలను పది రోజుల్లోగా రాతపూర్వకంగా సమర్పించాలని మెటా యాజమాన్యాన్ని కమిటీ ఆదేశించింది.

ఈ వివాదంపై మెటా ప్రతినిధులు వివరణ ఇస్తూ..  సాంకేతిక లోపం కారణంగానే పొరపాటున ఆ వీడియో డిలీట్ అయిందని, విషయాన్ని గుర్తించిన వెంటనే పునరుద్ధరించామని తెలిపారు. జరిగిన పొరపాటుకు విచారం వ్యక్తం చేసినట్లు కూడా వెల్లడించారు. అయితే.. కేంద్ర సమాచార ప్రసార మంత్రిత్వ శాఖతో పాటు పార్లమెంటరీ ప్యానెల్ కూడా ఈ వివరణతో సంతృప్తి చెందలేదు. 

విచారణ ఎదుర్కొంటున్న మెటా సంస్థ ప్రతినిధులను ఎంపీలు నిలదీశారు. ప్రధాని వీడియోను తొలగించడానికి ఎవరు అనుమతి ఇచ్చారు, అల్గారిథమ్ ఆధారంగా కంటెంట్ తొలగించే ప్రక్రియలో ఎంతవరకు పారదర్శకత ఉందనే విషయాలపై ప్రశ్నల వర్షం కురిపించారు. విద్వేషపూరిత, అసభ్యకరమైన కంటెంట్ వేదికలపై పదేపదే కనిపిస్తున్నప్పటికీ చర్యలు తీసుకోని సంస్థలు, దేశ ప్రధాని అధికారిక సందేశాలను తొలగించడం ఏమిటని ఆగ్రహం వ్యక్తం చేశారు. 

ఈ విషయంలో మెటా అధినేత మార్క్ జుకర్‌బర్గ్ వ్యక్తిగతంగా క్షమాపణ చెప్పాలని డిమాండ్ చేశారు. క్షమాపణ చెప్పకుంటే..  భారత సమాచార సాంకేతిక చట్టం కింద మెటాకు లభిస్తున్న  సేఫ్ హార్బర్  రక్షణను ఉపసంహరించుకోవాలని కేంద్ర ప్రభుత్వానికి సిఫార్సు చేస్తామని  పార్లమెంటరీ కమిటీ ఛైర్మన్ నిషికాంత్ దూబే స్పష్టం చేశారు.   

Mark Zuckerberg Apology,  PM Modi Video Remove,  Meta Facebook, IT Parliamentary Committee. India IT Ministry Meta Controversy