తనకు తెలుగులో ఏ హీరో ఇష్టమో బాలీవుడ్ హీరోయిన్ దీపిక పడుకోన్ చెప్పేసింది. దీపికా పదుకోన్ లాంటి హీరోయిన్‌కి నచ్చేసే హీరో మహేస్ బాబు కాకుండా మన టాలీవుడ్‌లో ఇంకెవరున్నార్లెండి. అర్జున్ కపూర్ హీరోగా, దీపికా పదుకోన్ హీరోయిన్‌గా హోమీ అదాజానియా దర్శకత్వంలో రూపొందిన ‘ఫైండింగ్ ఫెనీ’ సినిమా ప్రమోషన్ కార్యక్రమం కోసం హైదరాబాద్‌కి వచ్చిన దీపిక మహేష్ బాబు మీద తన మనసులో ఉన్న అభిప్రాయాన్ని బయటపెట్టింది. ‘‘తెలుగులో నాకు ఇష్టమైన హీరో మహేష్ బాబు. తెలుగు సినిమాలలో నటించాలని నేను గతంలో ఎంతో ఎదురుచూశాను. అయితే అప్పుడు నాకు అవకాశాలు రాలేదు. ఇప్పుడు నాకు తెలుగు సినిమాల్లో నటించాల్సిందిగా అవకాశాలు వస్తున్నాయి. అయితే ఇప్పుడు సమయం చిక్కడం లేదు’’ అని దీపిక ఈ సందర్భంగా చెప్పింది.