మహబూబ్ నగర్: మహబూబ్ నగర్ జిల్లా కొల్హాపూర్ ఉప ఎన్నికల్లో టిఆర్ఎస్ పార్టీ తరపున పోటీ చేస్తున్న జూపల్లి కృష్ణారావు ఓట్లకు సిపిఎం అభ్యర్ధి జబ్బార్ గండికొట్టే ప్రమాదం ఉన్నట్లు తెలిసింది. తెలంగాణా వాదం పేరుతో జూపల్లి కృష్ణారావు కాంగ్రెస్ పార్టీకి, మంత్రి ఎమ్మెల్యే పదవులకు రాజీనామా చేసి ఉప ఎన్నికలకు సిద్దమయ్యారు. ఈ ఎన్నికల్లో కాంగ్రెస్ తరపున మామిళ్ళపల్లి విష్ణువర్దన్ రెడ్డి, టిడిపి నుంచి ముష్టిపల్లి జగదీశ్వరరావు, సిపిఎం తరపున జబ్బార్ పోటీ చేస్తున్నారు. జబ్బార్ కు ఈ నియోజకవర్గంలో బలహీన, బడుగు వర్గాల్లో మంచి పేరుంది. ఈ నియోజకవర్గంలో ఎవరికి ఏ సమస్య వచ్చినా సంబంధిత అధికారులతో మాట్లాడి పనులు జరిగేలా చూస్తారన్న పేరుంది. అనేకమంది పేదలకు పెన్షన్లు, ఇందిరమ్మ ఇళ్ళు ఆయన ఇప్పించగలిగాడు. ఈయన గెలిచే అవకాశం లేకపోయినప్పటికీ గణనీయంగా ఓట్లుపొందే పరిస్థితి నియోజకవర్గంలో ఉంది. జూపల్లికి ఖాయంగా పడతాయనుకుంటున్న ఓట్లతో కొన్ని జబ్బార్ చీల్చుకునే ప్రమాదం ఉందని స్వయంగా జూపల్లి అనుయాయులే అంగీకరిస్తున్నారు. జబ్బార్ ఎన్ని ఓట్లు ఎక్కువగా పొందితే జూపల్లికి అంత ఎక్కువ నష్టం జరుగవచ్చునని వారు భయపడుతున్నారు. జబ్బార్ కు ఓటు వేసినా ఆయన గెలవదని, ఆయనకు వేసే ఓటు వ్యర్ధమవుతుందని టిఆర్ఎస్ నాయకులు ప్రచారం చేస్తున్నారు. అయినా పెద్దగా ఫలితం కనిపించడం లేదు.