పురుషులందు పుణ్య పురుషులు వేరయా అన్నట్టు న్యాయమూర్తులందు న్యాయం కలవారు వేరయా అని అనాల్సి వస్తోంది. ఎందుకంటే ఆమధ్య ఓ పెద్ద జడ్జి గారు బోలెడంత లంచం తీసుకుని దొరికిపోయారు. పవిత్రమైన జడ్జి పదవిలో వుండి తప్పుడు పనులు చేస్తున్న వారు బయటపడుతూనే వున్నారు. తాజాగా అలాంటి మరో జడ్జి ఉదంతం బయటపడింది. మధ్యప్రదేశ్‌ హైకోర్టులో ఒక సీనియర్ జడ్జిగా వున్న తన కోర్టులోనే అడిషనల్ జడ్జిగా విధులు నిర్వర్తిస్తున్న మహిళను ఎప్పటి నుంచో వేధిస్తున్నాడు. ఈమధ్య కాలంలో ఆమెని ఐటమ్ సాంగ్‌కి డాన్స్ చేసి చూపించమని వేధిస్తున్నాడు. ఇంతకాలం అతగాడి వేధింపులు భరించిన ఆమె ఇక భరించలేక తన ఉద్యోగానికి రాజీనామా చేసేసింది. ఆ తర్వాత ఆ జడ్జిగారి నిర్వాకాన్ని రాష్ట్రపతి, సుప్రీంకోర్టు చీఫ్ జస్టిస్, కేంద్ర న్యాయశాఖ మంత్రికి ఆమె ఫిర్యాదు చేశారు. తన ఇంట్లో జరిగే ఓ వేడుకలో ఐటం సాంగుకు నర్తించాలని ఓ అధికారి ద్వారా వర్తమానం పంపారని ఆమె తన ఫిర్యాదులో పేర్కొన్నారు.