కర్నూల్ ఎంపి కోట్ల సూర్యప్రకాష్ రెడ్డికి పిసిసి అధ్యక్షులు బొత్స సత్యనారాయణ జలక్ ఇచ్చారు. ఆలూరు వ్యవసాయ మార్కెట్ కమిటి ఏర్పాటు విషయంలో బొత్స సత్యనారాయణ తన వర్గానికి చెందిన ఆలూరు ఎమ్మెల్యే నీరజారెడ్డి మాటకు ప్రాధాన్యత ఇచ్చారు. నిజానికి బొత్స ఈ పదవుల విషయంలో మొదట కోట్ల సూర్యప్రకాష్ రెడ్డికి హామీఇచ్చారు. అయితే తరువాత మారిన పరిణామాల దృష్ట్యా ఆయన కోట్ల మాటను పక్కన పెట్టి నీరజారెడ్డి సూచించిన సభ్యులకు పదవులు వచ్చేలా చక్రం తిప్పారు. దీంతో కోట్ల సూర్యప్రకాష్ రెడ్డి అవాక్కయ్యారు. ఈ ప్రాంతంలో కోట్ల సూర్యప్రకాష్ రెడ్డి - నీరజారెడ్డి మధ్య చాలాకాలం నుంచి విభేదాలున్నాయి. ఇద్దరూ పరస్పరం బహిరంగంగా విమర్శించుకునేవారు. ఈ పదవుల విషయంలో బొత్స చర్యతో వీరి మధ్య అగాధం మరింత పెరిగింది.